Tahir Mirkişili: "ABAD" mərkəzləri ilə ailə biznesi arasında müasir texnologiyalara əsaslanan əlaqələr qurulur"
Müslüm İbrahimov: “Ailə biznesinin inkişafı məqsədilə “ABAD” mərkəzlərinin yaradılması sahibkarlığın inkişafına səbəb olacaq”
Ötən il Prezident İlham Əliyev Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində "ABAD” publik hüquqi şəxsin yaradılması haqqında fərman imzaladı. "ABAD” (Ailə Biznesinə Asan Dəstək) mərkəzlərinin yaradılmasında məqsəd ölkənin sosial-iqtisadi inkişafında vətəndaşların fəal iştirakına, kiçik və orta sahibkarlığın inkişafına, əhalinin məşğulluq səviyyəsinin artırılmasına və rəqabətqabiliyyətli ailə təsərrüfatlarının formalaşdırılmasına dəstək vermək üçün sosialyönümlü layihələr həyata keçirməkdir.
Artıq Prezidentin təşəbbüsü ilə fəaliyyətə başlayan “ABAD” mərkəzləri kiçik ailə biznesinin inkişafına böyük töhfə verir.
Bazar iqtisadiyyatı inkişaf etmiş ölkələrdə kəmiyyət baxımından ən çox yayılan biznes forması ailə sahibkarlığıdır. Ailə təsərrüfatları dünyada ən qədim və ən çox yayılan biznes forması hesab edilir. Bir çox ölkələrdə ailə təsərrüfatları bazardakı təsərrüfatların 70 faizdən çoxunu təşkil edir və ölkənin iqtisadi inkişafında və iş yerlərinin yaradılmasında mühüm rol oynayır. Məsələn, İspaniyada bazardakı təsərrüfatların təqribən 75 faizi ailələrə aiddir və onların ÜDM-də payı 65 faizə çatır. Ailə təsərrüfatlarını xarakterizə edən amillər onların sürətlə yaradılması, qərarların qəbulunda sərbəstlik, bazarda çeviklik, yüksək motivasiya, qənaətçillik, dövlətdən dəstək alma imkanlarıdır.
Məlumat üçün bildirək ki, “ABAD” publik hüquqi şəxs ilkin mərhələdə pilot layihə olaraq Masallı rayonunda fəaliyyətə başlayıb. Bu ilin martında İçərişəhərdə “ABAD”ın ilk incəsənət mərkəzi açılıb. İyunda isə ikinci incəsənət mərkəzi Heydər Əliyev Beynəlxalq Aeroportunda istifadəyə verilib. Avqustun 3-də isə Prezident İlham Əliyevin iştirakı ilə Balakəndə “ABAD Mərkəz”in açılış mərasimi keçirilib. Mərasimdə qeyd edilib ki, hazırda bu layihə 130 ailəni əhatə edir. Həmin ailələrdən 22-si kənd təsərrüfatı məhsullarının, digərləri isə suvenirlərin istehsalı ilə məşğuldur. Bu məhsulların Bakı şəhərində yerləşən üç mağazada satışı təşkil edilir.
Prezidentin təşəbbüsü ilə fəaliyyətə başlayan “ABAD” mərkəzlərinin ölkə iqtisadiyyatına təsiri barədə danışan millət vəkili Tahir Mirkişili "Bakı-Xəbər"ə açıqlamasında qeyd etdi ki, artıq ölkədə bir neçə ABAD mərkəzi açılıb: "ABAD mərkəzləri ilə ailə biznesi arasında müasir texnologiyalara əsaslanan əlaqələr qurulub. Və bu əlaqələr artıq öz nəticələrini verməyə başlayıb. Ailə biznesi öz istehsal etdiyi məhsulları realizə etməyə, bundan mənfəət əldə etməyə başlayıb ki, bu da özünü məşğulluğun səviyyəsinin artmasına səbəb olub. Özünü məşğulluğun səviyyəsinin artması və ailə biznesinin inkişaf etdirilməsi kifayət qədər mürəkkəb və uzun zaman tələb edən bir fəaliyyətdir. Ancaq ilkin nəticələr göstərir ki, bu istiqamətdə atılan addımlar hər il yeni nəticələr əldə etməyə imkan verəcək".
İqtisad elmləri doktoru Müslüm İbrahimov isə mövzu ilə bağlı “Bakı-Xəbər”ə açıqlamasında bunları dedi: “ASAN Xidmət” artıq öz effektini göstərib. İnsanlar öz ehtiyaclarını vaxtlarına qənaət edərək “ASAN Xidmət” vasitəsilə həyata keçirirlər. “ASAN Xidmət”in yaradılması bürokratik əngəlləri aşağı endirdi”.
Həmsöhbətimizin sözlərinə görə, “ABAD” mərkəzlərinin yaradılması ölkədə sosial institutların təkmilləşdirilməsinə səbəb olub. Ailə Biznesinə Asan Dəstək mərkəzlərinin yaradılması ölkədə rəqabəti inkişaf etdirir: “O da bəllidir ki, biz bu gün biznes mühitini yaxşılaşdırmaq istəyirik. Həmçinin, təhsil sistemini daha da təkmilləşdirməliyik. Strateji Yol Xəritəsində bu addımlar dəstəklənir. “ABAD” sistemində həyata keçirilən bütün addımlar dəstək funksiyasını həyata keçirir. Bu isə ölkənin sosial-iqtisadi vəziyyətinin yaxşılaşdırılmasına səbəb olacaq.
Azərbaycanın özünəməxsus iqtisadi inkişaf modeli var. Həmin model hazırda işləyir. Və həmin modelə nəzər salanda görürük ki, artıq təkmilləşdirmələr baş verir”.
M.İbrahimov onu da vurğuladı ki, Strateji Yol Xəritəsində iqtisadi artımın intunsiv amili məsələsinə də toxunulub. İqtisadi artımın bu amili o deməkdir ki, hər bir cəmiyyətin üzvü ölkənin milli gəlirində iştirak etməlidir: “Kiçik və orta sahibkarlığın inkişaf etməsində əsas yük ailə müəssisələrinin üzərinə düşür. “ABAD” mərkəzləri də kiçik və orta sahibkarlığın inkişaf etdirilməsində önəmli rol oynayacaq. Ailə biznesinin inkişaf etdirilməsi ümumilikdə ölkənin iqtisadi inkişafına köməklik etmək deməkdir.”
İqtisadçının sözlərinə görə, əvvəllər kiçik və orta sahibkarlığın inkişafına yardım etmək üçün çoxşaxəli sistem var idi: “Bəzi ailələr biznes açmaq istəsələr belə, müəyyən problemlə üzləşirdilər. Problem deyəndə tək maliyyə deyil, məsləhət, dəstək resursu da nəzərə alınmalıdır. Həmçinin, aztəminatlı ailələr müəyyən səbəblərə görə ailə bizneslərinə qoşula bilmirdilər. Artıq “ABAD” xidmət mərkəzləri ailə biznesi ilə məşğul olmaq istəyən ailələrə hər mənada dəstək verəcək. Ailə biznesinin inkişafı məqsədilə “ABAD” mərkəzlərinin yaradılması sahibkarlığın inkişafına səbəb olacaq”.
Günel CƏLİLOVA
