Aydın Hüseynov: “Bu istiqamətdə çox uğurlu siyasət aparılır”
"Neft fondlarının yaradılmasının çox ciddi elmi əsaslandırması var. Son 50 ilə nəzər salsaq görərik ki, neft gəlirlərindən mərkəzləşdirilmiş qaydada istifadə etməyən ölkələr iqtisadi inkişaf baxımından digərlərindən geri qalır". Bunu mətbuata açıqlamasında Azərbaycan Respublikasının Dövlət Neft Fondunun (ARDNF) icraçı direktoru Şahmar Mövsümov bildirib.
Ş.Mövsümovun fikrincə, qısa müddət ərzində kifayət qədər böyük həcmdə vəsaitin daxil olması iqtisadiyyatın tarazlığını pozur, milli valyutanı kəskin bahalaşdırır, özəl sektorun rəqabət qabiliyyətini zəiflədir: "Bütün bunlar neft fondlarının yaradılmasının zəruriliyini bir daha ortaya qoyur. Təbii ki, fondların yaradılması əvəzinə pulların paylanılması variantı da seçilə bilər, lakin bunun sonu yaxşı olmur. Bunu bir neçə ölkənin misalında da göstərə bilərik. Lakin Azərbaycan və Qazaxıstanda istifadə olunan nümunə onu göstərir ki, neft fondlarının yaradılması düzgün, uzaqgörən, ölçülmüş addımdır".
ARDNF-in 1999-cu ildə yaradıldığını xatırladan icraçı direktor əlavə edib ki, Fondun əsas gəlir mənbəyi neft-qaz satışından əldə olunan vəsaitdir: "ARDNF yaradılandan bura 130 mlrd. dollardan çox vəsait daxil olub. Bu vəsaitdən 75 %-i müxtəlif infrastruktur layihələrinin reallaşdırılmasına yönəldilib, 25 %-i isə qorunub. Hazırda Fondda 35 mlrd. dollar var. Qanunvericiliyə əsasən, ARDNF ölkə daxilində həyata keçirilən layihələrə investisiya yatıra bilməz. Bizim kifayət qədər diversifikasiya olunmuş portfelimiz var".
Ümumilikdə, indiyədək daxil olan 130 milyard dollar neft gəlirindən nə dərəcədə səmərəli istifadə olunub? Məsələyə münasibət bildirən millət vəkili Aydın Hüseynov hesab edir ki, Azərbaycan daxil olan neft gəlirlərindən səmərəli istifadə edib. O bunu bir sıra arqumentlərlə əsaslandırır: “Hesab edirəm ki, ölkəyə gələn neft gəlirlərindən səmərəli istifadə olunub. Bi sıra işlər həyata keçirilib. Məsələ ondadır ki, Dövlət Neft Fondu mütəmadi olaraq özünün investisiya siyasətini təkmilləşdirir və genişləndirir. Bu da dövlətimiz üçün əlavə gəlirlərin əldə olunmasına imkan yaradır. Fondun əsas məqsədi neft amilinin iqtisadiyyata mənfi təsirlərinin minimuma endirilməsi, vəsaitlərin gələcək nəsillər üçün saxlanması məqsədilə düzgün yerləşdirilməsidir. Bu istiqamətdə çox uğurlu siyasət aparılır. Neft Fondunun köməyilə qısa müddət ərzində Azərbaycanda neft-qaz sektorunun özünəməxsus inkişaf modeli qurulub. Ölkəmizdə uğurla həyata keçirilən neft strategiyası vaxtilə xəyal kimi qəbul edilən bir sıra meqalayihələrin gerçəkləşməsinə səbəb oldu. Hazırda neftin satışından əldə edilən valyuta ARDNF-də cəmləşir və xalqımızın sosial-iqtisadi rifahının yaxşılaşdırılmasına yönəldilir. Neft Fondunun yaradılması ilə neft sərvətlərinin nəsillər arasında ədalətli bölgüsü, onların səmərəli və məqsədyönlü şəkildə idarə edilməsi üçün əsaslı təminat quruldu".
Vidadi ORDAHALLI
