Aydın Hüseynov: “Ticarət evləri fəaliyyətə başlayandan sonra bu sahədə nailiyyətlərimiz daha çox olacaq”
“Azərbaycanda qəbul edilən standartların təqribən 40 faizi bu gün Avropada tanınır”. Bunu mətbuata açıqlamasında Standartlaşdırma, Metrologiya və Patent üzrə Dövlət Komitəsinin sədri Ramiz Həsənov deyib.
O qeyd edib ki, ölkədə tətbiq edilən yeni standartlar Avropa standartlarına tamamilə uyğunlaşdırılıb: "Bir sıra köhnə standartlar da təkmilləşdirilir, Avropa və beynəlxalq standarlarla unifikasiya edilir".
Məlumat üçün qeyd edək ki, standart - sözün geniş mənasında işlənən nümunə, etalon, model olub başqaları ilə müqayisədə ilkin götürülür. Standart kütləvi istifadə üçün nəzərdə tutulmuş məhsulların (işlərin, xidmətlərin) keyfiyyətinə və təhlükəsizliyinə dair tələbləri müəyyənləşdirən normativ sənəddir.
İnsanların həyat və sağlamlığı, əmlakı, ətraf mühit üçün təhlükə yarada bilən məhsul (iş, xidmət) üçün dövlət tərəfindən müvafiq standart müəyyən edilir. Bunu dövlət, istehlakçı və istehsalçı arasında bağlanmış üçtərəfli ictimai müqavilə də adlandırmaq olar. İstehsalçı hamı üçün şəffaf olan bu standartlara ciddi surətdə əməl etməyə məcburdur. Çünki onun məhsulunun keyfiyyətinin standarta uyğunluğuna həm dövlət orqanları, həm də istehlakçılar asanlıqla nəzarət edə bilirlər. Məhsulun standarta uyğunluğu istehlakçıda məhsulun təhlükəsiziliyinə inam yaradır.
Bütün bu deyilənlərin fonunda, Azərbaycanda qəbul edilən standartların təqribən 40 faizinin bu gün Avropada tanınmasını ekspertlər necə dəyərləndirir?
Məsələyə münasibət bildirən millət vəkili Aydın Hüseynov bunun müsbət göstərici olduğunu bildirdi: “Hesab edirəm ki, bu çox normal göstəricidir. Nə mənada? Çünki artıq “Made in Azerbaijan” brendi adıyla ölkə məhsullarının xaricdə tanıdılması istiqamətində çox böyük işlər həyata keçirilir. Eyni zamanda, artıq Azərbaycanda istehsal olunan mallara dünyanın bir sıra ölkələrində tələbat artır. Bu da onu göstərir ki, istehsal olunan məhsulların keyfiyyəti yüksəkdir, Avropa standartlarına cavab verir. Reallıq ondan ibarətdir ki, bu məhsullara tələbat var və bu artan xətt üzrə inkişaf edir. Bu bir daha Azərbaycanın bu yöndə apardığı siyasəti daha da stimullaşdırır. Hesab edirəm ki, getdikcə bunların sayı və çeşidləri daha da artacaq, həm keyfiyyət baxımından, həm də say baxımından. Məlum olduğu kimi, bir çox ölkələrdə Azərbaycanın ticarət evləri fəaliyyətə başlayır. Onların müəyyən texniki təminatı, işçilərin təmin olunması istiqamətində işlər gedir. Ticarət evləri fəaliyyətə başlayandan sonra bu sahədə nailiyyətlərimiz daha çox olacaq. Ən başlıcası, bu, ölkəyə valyutagətirmə mənbələridir”.
Vidadi ORDAHALLI
