Vüqar Bayramov: “Bank Ombudsmanının yaradılması kredit problemləri ilə bağlı atılacaq addımlardan sadəcə biridir”
Azərbaycan Banklar Assosiasiyasının (ABA) nəzdində yaradılmış Bank Ombudsmanı institutu bu həftənin sonunadək fəaliyyətə başlayacaq. Bu barədə Azərbaycan Banklar Assosiasiyasından (ABA) məlumat verilib. Məlumatda qeyd olunur ki, Bank Ombudsmanına 2 min dollaradək maliyyə mübahisələrinin həll olunması üçün müraciət etmək mümkün olacaq.
Müraciətlərin qəbul edilməsi üçün www.bankombudsman.az saytı hazırdır. Bank Ombudsmanının əsas məqsədi banklara və onların müştərilərinə müqavilələrin bağlanması, icrası, dəyişdirilməsi və ya ləğv olunması ilə bağlı məsələləri məhkəməyə qədər həll etməyə kömək göstərilməsindən ibarətdir. Eyni zamanda, Bank Ombudsmanının yaradılmasında məqsəd müştərilərin banklara etimadının gücləndirilməsi və tərəflər arasında yaranan mübahisələrin məhkəməsiz həll edilməsidir. Ombudsman kreditlərin ödənilməsi və əmanətlərin qaytarılmasına aid çətinliklərin aradan qaldırılması məsələlərində vasitəşi qismində çıxış edəcək. İlkin mərhələdə Ombudsman 2 min ABŞ dolları və ya 3 min manatadək maliyyə mübahisələrinə baxacaq.
Bununla belə, yalnız o banklardan Ombudsmana şikayət etmək mümkün olacaq ki, onlar “Bankların müştəriləri - fiziki şəxslərlə əlaqədar mübahisələrin baxılmaq üçün Bank Ombudsmanına verilməsi haqqında Bəyannamə”ni imzalamış olsun.
Məlumat üçün qeyd edək ki, ABA-nın Rəyasət Heyətinin bu il aprelin 14-də keçirilmiş iclasında Bank Ombudsmanının reqlamentinə əlavə və dəyişikliklər təsdiq edilib, bu vəzifəyə İkram Heydər oğlu Kərimov təyin edilib.
Bütün bu deyilənlərin fonunda, ekspertlərin Bank Ombudsmanının fəaliyyətindən gözləntiləri nədir?
Sözügedən məsələni dəyərləndirən iqtisadçı-ekspert Vüqar Bayramov buna bir neçə prizmadan yanaşır: “Yeni struktur Maliyyə Ombudsmanı çərçivəsində yaradılacaq. Əslində, bu məsələ daha öncədən müzakirə edilən və iqtisadçılar tərəfindən təklif olunan mühüm layihələrdən biridir. Məlumdur ki, banklarla vətəndaşlar arasında mübahisələrin sayı həddindən artıq çoxdur. Hazırda 2 milyon 400 mindən artıq vətəndaşın birbaşa və ya dolayı yolla banklara kredit borcu var. Bu kifayət qədər böyük rəqəmdir. Eyni zamanda banklarla müştərilər arasındakı məhkəmə çəkişmələrinin sayı da durmadan artmaqdadır. Bank Ombudsmanının yaradılması problemlərin məhkəmədən kənar və ya məhkəməyə qədər həll edilməsini nəzərdə tutur. Əsas məqsəd banklarla müştərilər arasındakı gərginliyi azaltmaq, problemləri məhkəməsiz çözməyə cəhd göstərməkdir. Bank Ombudsmanının yaradılması kredit problemləri ilə bağlı atılacaq addımlardan sadəcə biridir. Böyük ehtimal ki, Ombudsman yaradıldıqdan sonra da banklarla müştərilər arasında məhkəmə çəkişmələri davam edəcək. Lakin düşünürəm ki, belə bir strukturun yaradılmasına zərurət var. Söhbət ondan getmir ki, yeni yaradılan qurum mövcud problemlərin hamısını aradan qaldıracaq. Belə düşünmək lazım deyil. Ombudsman ümumi prosesə sadəcə töhfə verə bilər. O baxımdan təşəbbüsü pozitiv dəyərləndirirəm və qısa zamanda yaradılmasını məqbul hesab edirəm”.
Vidadi ORDAHALLI
