Vüqar Bayramov: “Bu sahədə yaşanan tərəqqi neftdən asılılığı azaltmaq və daha dayanıqlı iqtisadi inkişafa nail olmaq baxımından vacibdir”
Ölkədə yaradılan əlverişli biznes mühiti xarici investorların diqqətini cəlb edir. Azərbaycanın təhlükəsiz mühiti, əlverişli iqlimi əcnəbi biznesmenlər üçün əlverişlidir. Açıqlanan statistik rəqəmlərə əsasən, son iki ildə Azərbaycanda xarici investisiyalı 100-dən çox müəssisə yaradılıb. Hökumətin qeyri-neft sektorunun inkişafına diqqəti artırmasından sonra əcnəbi iş adamları ölkəmizdə iş qurmağa daha çox həvəs göstərir.
Xarici investorlar sənaye, tikinti, nəqliyyat, turizm və ticarət sahələrinə daha çox maraq göstərir. Məlumat üçün bildirək ki, yeni qeydiyyata alınan müəssisələrdən kommersiya fəaliyyəti və idarəetmə sahəsində ixtisaslaşan “Sparkassen Advisory Services” MMC Almaniyanı, mühəndis avadanlıqlarının quraşdırılması ilə məşğul olan “General Engineering Services and Supply Company LP” Böyük Britaniya və Şimali İrlandiya Birləşmiş Krallığını, bazar konyunkturasının tədqiqi və ictimai rəyin öyrənilməsi ilə məşğul olan “Trea International Group, İNC” şirkəti Amerika Birləşmiş Ştatlarını, nəqliyyat sahəsində ixtisaslaşmış “SKYBUS” MMC Estoniyanı, “United Alliance Group LTD” şirkəti Birləşmiş Ərəb Əmirliklərini, “Vega International Car Transport & Logistic-Trading Gesellschaft” şirkəti Avstriyanı, “DB International GMBH” şirkəti Almaniyanı, kartoqrafiya fəaliyyəti göstərən “AİRBUS Ds Geo Sa” şirkəti Fransanı, neft və təbii qaz sahəsində fəaliyyət göstərən “Qinterra Technologies AS” və “EPİ limited” şirkətləri Norveç Krallığını, tikinti sektorunda çalışan “LAB TEC” MMC İran İslam Respublikasını, turizm xidmətləri göstərən “Kroun Konsaltinq” şirkəti Ukraynanı, rezin məmulatların istehsalı ilə məşğul olan “Coşkun Kauçuk” MMC Türkiyəni təmsil edir.
Biznes fəaliyyətini genişləndirmək məqsədilə ölkəmizə üz tutan xarici investorların sayının artması barədə fikir bildirən iqtisadçı-ekspert Vüqar Bayramov “Bakı-Xəbər”ə açıqlamasında qeyd etdi ki, hazırda qeyri-neft sektorunun inkişafı prioritet məsələlərdən biridir: “İndiki məqamda Azərbaycan hokuməti qeyri-neft sektoruna daha çox investisiya cəlb olunmasına çalışır. İnvestisiya muhitinin yaxşılaşdırılması və qeyri-neft sektoruna vəsaitlərin cəlb olunması ilə bağlı dövlət tərəfindən təşviqedici addımların atılması bu sahəyə marağı artırır.Və nəticə etibarilə yerli və xarici investorlar Azərbaycana yatırım etməkdə maraqlıdır”.
Həmsöhbətimizin sözlərinə görə, qeyri-neft sektoruna daha çox investisiyanın cəlb olunması postneft dövrundə həyata keçirilən islahatlarla bağlıdır. Bu dövrun islahatları ölkəyə yatırılan investisiyaların artmasına səbəb olur.
V.Bayramov bildirdi ki, xarici özəl şirkətlərin sayının artması yeni iş yerlərinin açılması deməkdir. Onun fikrincə, bu sahədə yaşanan tərəqqi neftdən asılılığı azaltmaq və daha dayanıqlı iqtisadi inkişafa nail olmaq baxımından vacibdir.
Günel CƏLİLOVA
