Bahadur Bilalov: “Hesab edirəm ki, turizmin inkişafı naminə Bakı şəhərində müəyyən yer ayrıla və orada kazinoların fəaliyyət göstərməsinə icazə verilə bilər”
Müzəffər Ağakərimov: “Kazino Azərbaycan mentalitetinə uyğun deyil”
Azərbaycanda turizm sahəsini inkişaf etdirmək, turist axınını daha da artırmaq üçün kazinoların yenidən bərpa olunması təklif olunur. Turist axınını daha da sürətləndirmək üçün ölkəmizdə yenidən kazino məkanlarının açılması məsələsi gündəmə gəlib. Məsələni isə jurnalist Azər Qərib gündəmə gətirib.
Onun sözlərinə görə, Azərbaycanda kazinoların fəaliyyətini bərpa etməklə dövlət büdcəsi xeyli gəlir əldə edər. Bundan başqa, qonşu Tiflisə yalnız qumar üçün yollanan xarici turistlər buraya gələr: “Monte-Karlo kazinosu bu balaca dövlətə gəlir gətirir, amma heç bir Monako vətəndaşı orada oynaya bilməz. Bu qanundur. Bildiyiniz kimi, kazinolara pasportsuz buraxmırlar və Monte-Karlo kazinosu dünyada bəlkə də yeganə yerdir ki, orada Monako pasportuna hörmət etmirlər. Müəyyən yerlərdə, müəyyən məhdudiyyətlərlə, Azərbaycan vətəndaşlarının buraxılmaması şərti ilə işləyən kazinolar həm investisiyaların gəlişi, həm də iş yerləri deməkdir”.
Maraqlıdır, Azərbaycanda kazinoların fəaliyyətə başlamasına ehtiyac varmı?
Turizm sahəsi üzrə ekspert Bahadur Bilalov “Bakı-Xəbər”ə açıqlamasında qeyd etdi ki, uzun illər öncə ölkəmizdə çoxlu sayda kazino var idi. Mərhum prezident Heydər Əliyevin sərəncamı ilə kazinolar bağlandı: “Qonşu Rusiyada kazinoların fəaliyyəti dayandırıldı. Ancaq müəyyən müddər keçəndən sonra qərara gəlindi ki, Rusiyada kazinolar yenidən açılmalı və xüsusi yerlərdə fəaliyyət göstərməlidir”.
Həmsöhbətimizin sözlərinə görə, dünyada məşhur olan turizm növlərindən biri də kazinodur: “ Las-Veqas, Monte-Karlo kimi yerlərə insanlar məhz oyun oynamaq üçün gedirlər. Statistik rəqəmlərə əsasən, il ərzində 10 milyona yaxın insan Las-Veqasa sırf kazinolarda əylənmək üçün gedir. Hesab edirəm ki, turizmin inkişafı naminə Bakı şəhərində müəyyən yer ayrıla və orada kazinoların fəaliyyət göstərməsinə icazə verilə bilər. Xüsusi olaraq qeyd edim ki, ölkəmizdə kazino açılsa, ora Azərbaycan vətəndaşlarının girişi qadağan olunmalıdır. Yerli vətəndaşların kazinoya girişi qadağan olunmaq şərti ilə xaricilər üçün fəaliyyət göstərə bilər. Unutmaq lazım deyil ki, bizdə yetərincə xarici iş adamı çalışır. Hətta qeyri-rəsmi məlumatlara əsasən, xarici iş adamları sırf kazinolarda əylənmək üçün həftə sonları Tiflisə gedirlər. Onlar öz pullarını uzaqda deyil, elə bizim ölkədə rahat şəkildə xərcləyə bilərlər. Zənnimcə, kazinolar açılsa, Azərbaycan iqtisadiyyatı yalnız gəlir əldə edər”.
B.Bilalov onu da vurğuladı ki, ölkəmizin təbiətinə, iqliminə vurğun olanlar üçün də kazinoların olması xəbəri onların ürəyincə olar. Turistlər həm təbiəti görüb mənəvi zövq almaq, həm də kazino kimi əyləncə mərkəzlərində əylənmək istəyirlər.
Azərbaycan Turizm Assosiasiyası (AzTA) sədrinin müşaviri Müzəffər Ağakərimov isə bildirdi ki, kazino açmaq üçün ilk olaraq onun açılacağı yeri müəyyənləşdirmək lazımdır: “Əvvəla onu deyim ki, kazino sahəsindən turizm sektoruna nə qədər gəlir gələcəyini bilmirəm. Onu bu işlə məşğul olan adamlar yaxşı bilər. Hesab edirəm ki, kazino üçün ayrıca yerlər ayrılmalıdır. Dünya təcrübəsində də belədir. Həmin məkanlar məktəblərdən, maarif və mədəniyyət ocaqlarından uzaq olmalıdır. Harada gəldi kazino açmaq olmaz. Əvvəllər bizdə kazinolar şəhərin mərkəzində fəaliyyət göstərirdi. Bu da düzgün deyildi.İlk olaraq kazinonun açıldığı yeri müəyyənləşdirsinlər. Amma onun yerini indiki şəraitdə müəyyənləşdirmək müşkül olacaq. Bu bizneslə məşğul olmaq istəyən şəxslər onu harada açmaq istədiklərinə düzgün qərar verə bilməyəcəklər. Ümumiyyətlə, kazino Azərbaycan mentalitetinə uyğun deyil”.
Günel CƏLİLOVA
