Rəşad Həsənov: “Neftin qiyməti öz sabitliyini qoruyarsa, dünya bazarında ABŞ dollarının mövqeyi ilə bağlı hazırkı tendensiya davam edərsə, manatın məzənnəsinə ciddi təzyiq baş verməyəcək”
“Qlobal iqtisadi qeyri-sabitlik manata ciddi təsir göstərməyəcək. Dünya iqtisadiyyatındakı qeyri-sabitlik fonunda hazırkı mərhələdə Azərbaycan manatının yenidən devalvasiyaya uğraması gözlənilmir”. Bunu "Saxo Bank"ın valyuta strategiyası üzrə mütəxəssisi Con Hardi (John Hardy) manatın yeni devalvasiya dalğası ilə üzləşməsinin mümkünlüyü ilə bağlı sualı cavablandırarkən bildirib.
Analitikin fikrincə, hazırda qlobal iqtisadi qeyri-sabitlik müşahidə olunmur: "İnkişaf etmiş ölkələrin aktivlərinə tələbat dalğalansa da, inkişaf etməkdə olan ölkələrdə biznesə maraq və bu kateqoriyadan olan ölkələrin valyutalarının möhkəmlənməsi və aktivlərinin bahalaşmasını müşahidə edirəm".
"Bu səbəbdən əgər manatda hər hansı devalvasiya prosesi baş verərsə, bu, istisnasız olaraq, lokal bazardakı vəziyyətlə əlaqəli olacaq. Devalvasiyaya kapitalın ölkədə saxlanmasına inam, fiskal və siyasi vəziyyət, habelə neftin qiymətinin təsir edəcəyini düşünürəm. Belə ki, neft Azərbaycanın ixracında yüksək paya sahib olmaqla valyuta gəlirlərinin əsasını təşkil edir", - deyə C.Hardi vurğulayıb.
"Saxo Bank"ın valyuta strategiyası üzrə mütəxəssisi Con Hardinin Azərbaycan manatı ilə bağlı səsləndirdiyi fikirlərə münasibət bildirən iqtisadçı-ekspert Rəşad Həsənov “Bakı-Xəbər”ə açıqlamasında qeyd etdi ki, hazırda Azərbaycan manatında dayanıqlıq müşahidə olunur: “Hazırkı şərtlər daxilində Azərbaycan manatı son 7 ay ərzində stabillik nümayiş etdirir. Ancaq onu da unutmaq lazım deyil ki, manatın məzənnəsində əsas element neftin qiymətidir. Neftin qiymətinin dünya bazarında dəyişmə tendensiyasından asılı olaraq manata hər zaman təzyiq risqi var. Hələ də neftin qiymətinin gələcək dinamikası ilə bağlı ziddiyyətli proqnozlar səslənir Bir sıra maliyyə qurumları, investorlar hesab edir ki, ABŞ neftinin hasilatının artması, eyni zamanda OPEC-ə daxil olmayan ölkələr arasında sazişin hansısa formada pozulması nəticəsində neftin qiyməti 40 dollara qədər ucuzlaşa bilər. Əgər bu tendensiya baş versə, son nəticədə ölkənin xarici ticarət saldosunda mənfi hallar qeydə alınsa, manat məzənnəsini müdafiə edə bilməyəcək. Neftin qiyməti öz sabitliyini qoruyarsa , dünya bazarında ABŞ dollarının mövqeyi ilə bağlı hazırkı tendensiya davam edərsə, manatın məzənnəsinə ciddi təzyiq baş verməyəcək”.
Günel CƏLİLOVA
