Zakir Əhmədov: “Nəzərə almaq lazımdır ki, Cənubi Koreya şirkətlərinin bu sahədə zəngin təcrübəsi var”
Sentyabrın 13-də Bakıda Azərbaycan-Cənubi Koreya işgüzar görüşü keçiriləcək. Bu məqsədlə Azərbaycana 10 Koreya şirkətinin ("Yelim Paint Spray", "Mattron Corporation", "Dongsan Valve", "Jin Gu Engineering", "Kwangwoon", "KEONSAE HIGH PRESSURE", "Daedong Marine TECH", "MSTECH", "DAEDONG INDUSTRIES" və "Beomchang") nümayəndəsi gələcək. Koreya şirkətlərinin səfəri çərçivəsində Bakıda, həmçinin, "Koreya və Azərbaycan arasında gəmiqayırma sahəsində ikitərəfli əməkdaşlıq” tədbiri keçiriləcək. Koreya şirkətləri gəmiqayırma sahəsində Azərbaycanla əməkdaşlıqda maraqlıdırlar. Bununla yanaşı, digər məsələlər də müzakirə olunacaq.
Dövlət Gömrük Komitəsinin məlumatına görə, 2017-ci ilin yanvar-iyulunda Azərbaycanla Koreya arasında ticarət dövriyyəsi təxminən $ 38 milyon dollar təşkil edib. Ticarətin, demək olar ki, bütün həcmi Koreya məhsullarının idxalına düşüb.
Ümumilikdə, iki ölkə arasında bir sıra sahələr üzrə iqtisadi əməkdaşlıq var. 2008-ci ildə Azərbaycanda gəmiqayırma zavodunun inşası ilə bağlı qərar veriləndə Cənubi Koreya şirkətlərinin də bu işdə iştirakı nəzərdə tutulub. Görünən odur ki, Cənubi Koreya şirkətləri bu sahədə əməkdaşlığı daha da inkişaf etdirməkdə maraqlıdırlar. O üzdən, qarşıda gözlənilən işgüzar görüşdə buna xüsusi önəm veriləcəyi gözlənir. Bütövlükdə, gəmiqayırma sahəsinin inkişafında iki ölkənin əməkdaşlığı Azərbaycan iqtisadiyyatının inkişafında nə kimi rol oynayacaq?
Məsələyə münasibət bildirən ekspert Zakir Əhmədovun sözlərinə görə, gəmiqayırma sahəsinin inkişafı ölkənin ümumi iqtisadi inkişafına ciddi təkan verəcək: “Son illər Azərbaycanda bu sahədə ciddi işlər görülür. Ələt limanının tikintisi, gəmiqayırma zavodunun inşası və bu istiqamətdə digər işlərin görülməsi deyilənlərə əyani misaldır. Nəzərə almaq lazımdır ki, Cənubi Koreya şirkətlərinin gəmiqayırma sahəsində zəngin təcrübəsi var. Sözügedən ölkədə istər kiçiktutumlu, istərsə də iritonnajlı gəmilər hazırlanır. Son illər Cənubi Koreya şirkətlərinin rəqabət qabiliyyəti bir az da artıb. Heç şübhəsiz ki, Azərbaycanda gəmiqayırma sənayesinin inkişafı qeyri-neft sektorunun inkişafı deməkdir. Bu imkan verəcək ki, sənayenin sözügedən sahəsi Azərbaycanda inkişaf etsin. Həmçinin, bu, ölkədə yeni və eyni zamanda dayanıqlı iş yerlərinin açılması deməkdir. Ümumilikdə, Azərbaycanda iqtisadiyyatın inkişafı baxımından gəmiqayırma sahəsinin inkişafı müsbət perspektiv vəd edir”.
Vidadi ORDAHALLI
