Mehriban Zeynalova: "Sahibkarlıq bacarığı olan qadınlara əsasən xanımın maddi gəlirinin artacağından qorxan kişilər mane olur"
Azərbaycanda sahibkarlığın inkişafı üçün müxtəlif addımlar atılır. Kənd təsərrüfatı və ya iqtisadiyyatın digər sahələrində yatırım etmək istəyənlər üçün dövlət tərəfindən hər cür şərait yaradılır. Sahibkar dedikdə daha çox kişilər nəzərdə tutulur. Düzdür, bu sahədə qadınlar da çalışırlar, amma onların sayı o qədər azdır ki, ümumi qiymətləndirəndə, demək olar ki, gözə görünmürlər. Amma hazırda bu boşluğun doldurulması üçün işlər başlanıb.
Məlumat üçün bildirək ki, inkişaf etmiş və ya inkişaf etməkdə olan ölkələrdə kişi sahibkarlarla yanaşı, qadın sahikbkarlar da fəaliyyət göstərir. Sahibkarlıq sahəsində əksər xarici ölkələrdə gender bərabərliyi tam olaraq qorunur.
Maraqlıdır, bizdə bu sahədə vəziyyət necədir?
Mövzu ilə bağlı fikir bildirən "Təmiz Dünya" İctimai Birliyinin sədri Mehriban Zeynalova "Bakı-Xəbər"ə açıqlamasında qeyd etdi ki, hazırda Azərbaycanda sahibkar qadınların sayı az deyil. Sadəcə, kapital sahibi olan sahibkar qadın, demək olar ki, Azərbaycanda yoxdur: "Sahibkar adı ilə qeydiyyatdan keçmək sahibkarlıq demək deyil. Etiraf etmək lazımdır ki, bizim biznes ledilərimiz var. O ledilər müəyyən işlər görürlər. Ancaq dünyada olan müəyyən kapitala sahib, tanınmış biznes ledilərimiz yox səviyyəsindədir. Öz biznesini çətinliklə idarə edən qadınlarımızın sayı çox az saydadır".
Həmsöhbətimizin sözlərinə görə, Azərbaycanda fəaliyyət göstərən qadın sahibkarlar, əslində, xırda sahibkarlardır. Bu hal bizdə yeni bir tendensiyadır: "Bu baxımdan yaxın müddət ərzində qadın milyonerlərimizin sayının artacağını gözləmək düzgün deyil. Bəllidir ki, hər zaman pul kişilərin əlində olub. Son 20 il ərzində isə qadınlar artıq pula sahib olurlar və sahibkarlıqla məşğul olmağa başlayırlar".
M.Zeynalova bildirdi ki, sahibkarlıq fəaliyyəti ilə məşğul olmaq istəyənlərə bəzən maneçilik törədilir: "Sahibkarlıq bacarığı olan qadınlara əsasən xanımın maddi gəlirinin artacağından qorxan kişilər mane olur. Digər səbəb isə sahibkar bacarığı olan, lakin kapitalı olmayan qadınlardır. Həmçinin, bəzi qadınlar sahibkarlıq fəaliyyətinin elmi əsasları və onun nəzəri biliklərini bilmirlər. Sadəcə, bu sahədə məşğul olmaq istəyirlər".
Birlik sədri onu da vurğuladı ki, orijinal ideyaların olmaması qadın sahibkarların fəaliyyətinə təsir edir. Elə ideyalar var ki, zamanla böyük gəlir gətirir. Təəssüf ki, bizdə əksər insanlar ilk gündən yüksək məbləğdə gəlir əldə etmək istəyinə düşürlər. Təbii ki, bu istək uğura aparmır.
Günel CƏLİLOVA
