Müslüm İbrahimov: "Fermerlər torpağın münbitliyini nəzərə alıb dağətəyi ərazilərdə əkin əkiblər"
Gədəbəy rayon ictimaiyyətinin nümayəndələri ilə görüş zamanı Azərbaycan Prezidenti İlham Əliyev qeyd edib ki, gələcək illərdə emal sənayesinin, kənd təsərrüfatının inkişafı rayon üçün prioritet olaraq qalacaq:
"Biz hamımız - siz də, fermerlər də, sahibkarlar da növbəti illərdə bu istiqamətdə çalışmalıyıq ki, məhsuldarlığı artıra bilək. Mən yolla gələndə gördüm ki, fermerlər artıq dağların yamaclarında da əkin işlərinə başlamışlar. Yəni bu nəyi göstərir? Onu göstərir ki, artıq bütün yerlər əkilib. Bu da çox sevindirici haldır ki, indi fermerlər artıq dağlara da çıxıblar və orada da əkin işləri aparırlar".
Ekspertlərin fikrincə, fermerlərin dağətəyi ərazilərdə əkinçiliklə məşğul olması artıq Azərbaycanda kənd təsərrüfatının inkişaf etməsindən xəbər verir.
İqtisad elmlər doktoru Müslüm İbrahimov "Bakı-Xəbər"ə açıqlamasında qeyd etdi ki, fermerlər torpağın münbitliyini nəzərə alıb dağətəyi ərazilərdə əkin əkiblər: "Hesab edirəm ki, torpaqların özünə xas tərzdə istifadə olunması artıq öz həllini tapır. Aydındır ki, hansısa kənd təsərrüfatı məhsulunu artırmaq üçün torpaqdan xüsusi şəkildə istifadə etmək lazımdır. Torpaqçılığın inkişafı ilə bağlı ixtisaslaşma problemi müəyyənləşir. Bəllidir ki, Prezident İlham Əliyev bu yaxınlarda Qax, Zaqatala zonasında da olub. Prezidentin bu səfərləri onu göstərir ki, artıq regionlar üzrə kənd təsərrüfatının ixtisaslaşması aparılır. Regionlar üzrə hansısa məhsulun istehsalı ilə bağlı ixtisaslaşma aparılır".
Həmsöhbətimizin sözlərinə görə, hər bir torpağın öz mühitinə görə məhsul istehsal etmək olur: "Elə torpaq var ki, orada müəyyən bitkilər bitə bilməz. Bu səbəbdən regionların torpaqlar üzrə ixtisaslaşması mühümdür. Bütün regionlar öz xüsusiyyətlərinə görə bölünür. Məsələn, şimal zonasında tütünçülük, fındıqçılıq, cənub zonasında çayçılıq inkişaf etdirilir, qərb zonasında isə başqa bir məhsul istehsal olunur".
Günel CƏLİLOVA
