Əli Əlirzayev: "Prezidentin tövsiyə etdiyi sistem düzgündür və istehsalçılarda stimul yaradır"
"Hesab edirəm ki, gələcəkdə məhsul istehsalında artıma nail olmaq üçün bu ən optimal metodlardan biridir"
Ölkədə qeyri-neft sektorunun inkişafı məqsədilə bir sıra istiqamətlərdə islahatlara başlanıb ki, onlardan biri də kənd təsərrüfatının inkişaf etdirilərək iqtisadiyyatın sabit və dayanıqlı sahələrindən birinə çevrilməsidir. Aqrar sektorun inkişafı, onun sabit, dayanıqlı sahəyə çevrilməsi və buraya investisiyaların cəlb edilməsi üçün tələb olunan addımlardan biri də kənd təsərrüfatındakı risqlərin düzgün və səmərəli idarə edilməsidir. Kənd təsərrüfatının inkişafı istiqamətində həyata keçirilən tədbirlərin ardıcıllığı bu sektorda bütün imkanlardan istifadə etməyə imkan verir.
Bu günlərdə Prezident İlham Əliyev Gədəbəy rayon ictimaiyyətinin nümayəndələri ilə görüşündə bildirib ki, bu gün özümüzü ərzaq məhsulları ilə tam təmin etmək üçün böyük işlər görürük: "Ancaq bizim torpaq fondumuz məhduddur. Ona görə bundan sonra kənd təsərrüfatı ancaq məhsuldarlığın artımı hesabına inkişaf etməlidir".
Gələcək illərdə emal sənayesinin, kənd təsərrüfatının inkişafının prioritet olaraq qalacağını deyən ölkə başçısı bildirib ki, hamı - fermerlər də, sahibkarlar da növbəti illərdə bu istiqamətdə çalışmalıdır ki, məhsuldarlığı artıra bilək: "Biz gələcəkdə istehsalın artımına ancaq məhsuldarlığın artımı hesabına nail ola bilərik. Göygöl rayonunda açılan kənd təsərrüfatı laboratoriyasının fəaliyyəti nəticəsində biz buna nail ola bilərik. Ona görə bütün fermerlərə, kəndlilərə məsləhət görürəm ki, məhsuldarlığın artımına böyük diqqət göstərsinlər. Bu, ilk növbədə, onlara və dövlətə lazımdır. Çünki biz özümüzü bütün ərzaq məhsulları ilə tam şəkildə təmin etməliyik".
Kənd təsərrüfatında məhsuldarlığın artırılması o deməkdir ki, mövcud torpaq ehtiyatlarından səmərəli istifadə edilməlidir. Yəni əkin sahələrini artırmadan, yüksək aqrotexniki qulluq göstərməklə məhsul istehsalını artırmaq. Necə ki, inkişaf etmiş ölkələr məhz bu minvalla yüksək nəticələr əldə edirlər. Yaxud da mal-qaranın sayını artırmaqla deyil, cins heyvanlar bəsləməklə ət və süd istehsalını artırmaq olar.
Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-alim Əli Əlirzayev Prezidentin bu yanaşmasının tamamilə doğru olduğunu bildirdi: "Hesab edirəm ki, gələcəkdə məhsul istehsalında artıma nail olmaq üçün bu ən optimal metodlardan biridir. Bunun üçün torpağın imkanları dəyərləndirilməli və ən başlıcası isə, torpağa əlavə kapital yönəldilməlidir. Lazımi aqrotexniki qulluq göstərilməli, əkin zamanı gübrələrdən düzgün istifadə edilməlidir. Bu zaman torpağa məxsus olan keyfiyyət bir az da artacaq. Ən başlıcası isə, məhsuldarlıq artacaq. Nəticədə ölkə üzrə kənd təsərrüfatı məhsullarının istehsalı əhəmiyyətli şəkildə artacaq. Bu zaman həm yerli tələbat daxili istehsal hesabına təmin ediləcək, həm də ixrac olunan kənd təsərrüfatı məhsullarının həcmi və çeşidi artacaq. Bu zaman sahibkar, fermer maraqlı olacaq ki, məhsuldarlıq artsın. Çünki məhsuldarlığın artması həm də gəlirin artması deməkdir. Ona görə də Prezidentin tövsiyə etdiyi sistem düzgündür və istehsalçılarda stimul yaradır".
Vidadi ORDAHALLI
