Zakir Əhmədov: "Digər problem isə sığorta şirkətlərinin öz işini lazımi səviyyədə qura bilməməsidir"
Maliyyə bazarlarında son vəziyyətin təhlili sığora bazarına marağın hələ də istənilən həddə olmadığını göstərir. Əhalinin böyük əksəriyyətinin hələ də sığorta şirkətlərinə marağı aşağıdır. Hətta icbari sığorta sahəsində belə hələ də istənilən nəticə yoxdur.
Məsələn, araşdırmalar göstərir ki, 2016-cı ildə avtomobil sığortası bazarı kiçilib. Ümumi yığımların həcmi 2 faiz azalaraq 103 milyon 830 min manat olub. Halbuki, 2015-ci ildə avtomobil sığortasından 105 milyon 675 min manat sığorta haqqı toplanmışdı. Bu ilin yanvar-iyun aylarında isə Azərbaycanda fəaliyyət göstərən 21 sığorta şirkətinin xəttilə 276 milyon 158 min manat sığorta haqqı toplanıb. Bu, ötən ilin eyni dövrü ilə müqayisədə 3,2 faiz azdır. Hesabat dövründə sığorta şirkətlərinin həyata keçirdiyi ödənişlər isə 22,7 faiz artaraq 124 milyon 41 min manat təşkil edib.
Diqqətçəkən məqam odur ki, ilk yarımildə sığorta bazarında toplanmış hər 100 manat sığorta haqqının 45,1 manatı ödəniş edilib. 2016-cı ilin müvafiq dövründə bu göstərici 35,5 manat olub. Cari ilin qeyd edilən dövründə də avtomobil sığortasından yığılan vəsaitin həcmi istənilən həddə olmayıb. Halbuki, ölkədə avtomobillərin sayı artır və onların sığortalanması icbari şəkildə həyata keçirilir.
Maraqlıdır, sığorta bazarında toplanmış hər 100 manat sığorta haqqının 45 manatının ödənişə, 55 manatının isə sığorta şirkətlərinə qaldığı halda, niyə bu sahə yerində sayır? Niyə avtomobil sığortasına maraq azdır?
Məsələyə münasibət bildirən ekspert Zakir Əhmədov bunu müxtəlif amillərlə əlaqələndirdi: "Səbəblər müxtəlifdir. Başlıca səbəb ümumi iqtisadi vəziyyətlə əlaqədardır. Məsələ ondadır ki, 3 il əvvəl neftin qiymətinin kəskin ucuzlaşması və ondan sonra yaşanan devalvasiya sığorta bazarına də təsir edib. Bankların sayının azalması ilə yanaşı, sığorta xidməti göstərən şirkətlərin də sayında azalma var. O cümlədən baş verənlər sığorta şirkətlərinə də öz təsirini göstərib. Bu sahədə ən başlıca problem isə əhalinin sığorta şirkətlərinə etimadının çox aşağı səviyyədə olmasıdır. Bu da təsadüfi deyil. Çünki bir sıra sığorta şirkətlərinin müştəri qarşısında öz öhdəliklərini yerinə yetirməməsi onlara inamı azaldıb. Digər problem isə sığorta şirkətlərinin öz işini lazımi səviyyədə qura bilməməsidir. O üzdən, avtomobil sahibləri maşını sığorta etməkdə maraqlı deyil".
Vidadi ORDAHALLI
