Samir Əliyev: "Hazırda toxuculuq sahəsində vəziyyət yaxşılığa doğru dəyişir və bu dəyişmə özünü statistik rəqəmlərdə də göstərir"
Bu ilin ilk yeddi ayında toxuculuq sənayesi, geyim, dəri və dəridən məmulatların, ayaqqabıların istehsalı sahələrində 135,1 milyon manat dəyərində məhsul istehsal edilib.
Dövlət Statistika Komitəsinin yaydığı məlumata əsasən, əvvəlki ilin yanvar-iyul ayları ilə müqayisədə toxuculuq sənayesində 98,5 faiz, geyim istehsalında 49 faiz artım, dəri və dəridən məmulatlar, ayaqqabı istehsalında isə 38,3 faiz azalma müşahidə olunub.
Toxuculuq sənayesində qeydə alınan artımla bağlı fikir bildirən iqtisadçı-ekspert Samir Əliyev "Bakı-Xəbər"ə açıqlamasında qeyd etdi ki, toxuculuq sənayesində artımın qeydə alınması təbiidir. Onun fikrincə, adıçəkilən sahədə artımın baş verməsi gözlənilirdi: "Qeyri-neft sektorunun istənilən sahəsində qeydə alınan artım əhəmiyyətli dərəcədə özünü göstərir. O cümlədən, toxuculuq sənayəsində də baş verən inkişaf artıq hiss olunmaq səviyyəsindədir. Nəzərə almaq lazımdır ki, bizdə müvafiq dövri müqayisə aparılır. Azərbaycan iqtisadiyyatı üçün 2015-2016-cı illər çətin oldu. Həmin dövrdə bir sıra şirkətlərə müəyyən zərbə dəydi. O ərəfədə istehsal və satışın həcmi aşağı düşdü. Ancaq indi isə vəziyyət yaxşılığa doğru dəyişir. Bu dəyişmə özünü statistik rəqəmlərdə də göstərir".
İqtisadçının sözlərinə görə, toxuculuq sənayesində qeydə alınan 98 faiz artım yüksək göstəricidir. Ümid edək ki, adıçəkilən sahənin həcmində də analoji artım baş verəcək.
S.Əliyev hesab edir ki, toxuculuq sənayəsində yaşanan artım davamlı olacaq. Bu tendensiya yaxın illər ərzində özünü daha yüksək şəkildə hiss etdirəcək.
Günel CƏLİLOVA
