Zakir Əhmədov: "Müxtəlif xidmət sahələrinin fəaliyyət göstərməsi işsizliyin azalmasına öz müsbət təsirini göstərir"
"İndi bölgələrdə işsizliklə bağlı problem, demək olar ki, aradan qaldırılır". Bunu Prezident İlham Əliyev Kənd Təsərrüfatı Nazirliyinin Göygöl Rayon İdarəsinin inzibati-laboratoriya binasının açılışı zamanı deyib.
Onun sözlərinə görə, ənənəvi kənd təsərrüfatı sahələri bərpa edilir: "Bizim üçün ənənəvi olan kənd təsərrüfatı sahələri bərpa edilir, dirçəldilir. Pambıqçılıq. Son iki il ərzində biz pambıqçılığı, demək olar ki, 10 dəfəyə yaxın artırmışıq. İndi minlərlə, on minlərlə insan işləyir və əməkhaqqı alır. Biz tütünçülüyü də, ipəkçiliyi də bərpa edirik.
Bizim kənd təsərrüfatı məhsullarımızın ixrac potensialı çoxşaxəlidir. Bu bizim böyük xoşbəxtliyimizdir. Çünki bizim 9 iqlim zonamız var. Bizdə həm meyvə-tərəvəz, həm tütün, pambıq, üzüm, spirtli içkilər, fındıq, badam, çay, sitrus meyvələri, yəni hər şey var. Sadəcə olaraq gərək biz bu təbii imkanlardan düzgün istifadə edək, istifadə edirik və son illərdə kənd təsərrüfatı sahəsində çox böyük inkişaf var. Biz indi ənənəvi sahələri bərpa etməklə daha da böyük potensial yaradacağıq".
Dövlət başçısının sözlərinə görə, sözügedən sahələr bundan sonra ancaq elmi biliklər əsasında inkişaf etdirilməlidir: "Dövlət öz üzərinə düşən bütün vəzifələri yerinə yetirir, bütün bölgələrdə belə gözəl laboratoriyalar, mərkəzlər yaradılır, fermerlərə subsidiyalar, güzəştli şərtlərlə gübrələr, yanacaq verilir, texnika alınır. Bu il Azərbaycana on min texnika gətirilib və gətiriləcək. Fermerlər, sahibkarlar, kəndlilər bu imkanlardan istifadə etməlidirlər. Bu, ilk növbədə, onlar üçün lazımdır, çünki məhsuldarlıq iki dəfə arta bilər. Bu həm də dövlət üçün lazımdır".
Görünən odur ki, bölgələrdə kənd təsərrüfatının inkişafı rayonlarda işsizlik probleminin həllinə ciddi təkan verir. Maraqlıdır, bəs ekspertlər məsələyə necə yanaşır?
Məsələyə münasibət bildirən ekspert Zakir Əhmədovun sözlərinə görə, son illər bölgələrdə bu istiqamətdə ciddi irəliləyişlər əldə olunub: "Bölgələrdə kənd təsərrüfatının müxtəlif sahələri inkişaf edir. Bu da, paralel olaraq, işsizliyin azalmasına təsir göstərir. Məsələ ondadır ki, kənd təsərrüfatında inkişafla yanaşı, emal müəssisələrinin də qurulmasına xüsusi önəm verilir. Rayonlarda müxtəlif kənd təsərrüfatı məhsullarının emalı ilə bağlı müəssisələr yaradılır. Bundan əvvəl infrastrukturun əsaslı şəkildə yenidən qurulması emal müəssisələrinin yaradılması üçün münbit zəmin yaradıb. Bunun nəticəsidir ki, sahibkarlar bölgələrdə müxtəlif profilli istehsal və emal müəssisələrinin yaradılmasında yaxından iştirak edirlər. Bunun nəticəsində regionlarda işsizlik probleminin həlli istiqamətində ciddi nəticələr əldə olunub. Həm müxtəlif kənd təsərrüfatı məhsullarının becərilməsi ilə məşğul olurlar, həm də istehsal və emal sahələrində çalışırlar. Digər tərəfdən, bölgələrdə müxtəlif xidmət sahələrinin fəaliyyət göstərməsi işsizliyin azalmasına öz müsbət təsirini göstərir".
Vidadi ORDAHALLI
