Rəsul Cahangirli: "Fikrimcə, bu yöndə iki ölkə arasında faydalı təcrübə mübadiləsi aparıla bilər"
Azərbaycan və Peru ikitərəfli, regional və çoxtərəfli səviyyələrdə əməkdaşlıq edə bilər. Bunu mətbuata açıqlamasında Perunun Bakıdakı müvəqqəti işlər vəkili Luis Çanq Boldrini deyib. O qeyd edib ki, iki ölkə arasında diplomatik münasibətlər 1996-cı ildə qurulub və həmin dövrdən bu münasibətlər inkişaf edir.
L.Ç.Boldrininin sözlərinə görə, Peru səfirliyinin Azərbaycandakı fəaliyyətinin prioritetləri siyasi və iqtisadi sahələrdə əlaqələrə diqqət ayırmaq olacaq: "Peru və Azərbaycan öz regionlarında böyük nüfuza malikdir. Hər iki ölkə xarici siyasət üzrə əməkdaşlıq etmək və təcrübə mübadiləsi aparmaq imkanına malikdir".
Diplomat bildirib ki, bu məqsədlə tərəflər hazırda Peru və Azərbaycan Xarici İşlər nazirlikləri arasında əməkdaşlıq haqqında Protokol çərçivəsində birinci görüşün təşkil olunması üzərində çalışır: "Biz bu görüşdə iştirak məqsədilə Azərbaycana yüksək səviyyəli nümayəndə heyəti göndərmək niyyətindəyik".
Görüşdə o da məlum olub ki, Peru Azərbaycanın neft-qaz sahəsində əldə etdiyi təcrübəni öyrənmək istəyir. Ümumilikdə, Azərbaycanın neft-qaz sahəsində hansı istiqamətlər: neftin hasilatı, ixracı, yoxsa bundan əldə olunun gəlirlərin idarə olunması Peru üçün cəlbedici ola bilər? Ekspertlərin bununla bağlı fikirləri nədən ibarətdir?
Ekspert Rəsul Cahangirlinin məsələyə münasibət belə oldu: "Peru aparıcı neft ölkəsi olmasa da, orada neft hasil olunur. Baxmayaraq ki, Peruda əsasən əlvan metallar hasil olunur. Bu ölkə əsasən mis istehsalçısıdır. Bununla yanaşı, Peruda neft-qaz da hasil olunur. Prinsipcə, Azərbaycanın neft-qaz sahəsində əldə etdiyi nailiyyətlərin hər üçü - istər hasil olunması, istərsə də ixracı və əldə olunan gəlirlərin səmərəli xərclənməsi, idarə olunması Peru üçün cəlbedici ola bilər. Nəzərə almaq lazımdır ki, Azərbaycan xarici neft şirkətləri ilə 1994-cü ildə "Əsrin kontraktı" sazişi imzaladıqdan sonra çox uğurlu əməkdaşlıq qurdu. Bunun nəticəsində Xəzər dənizinin dərinliklərindən böyük həcmdə neft-qaz hasil olunmağa başladı. Bir müddət neftin qiymətinin dünya bazarında yüksək olması imkan verdi ki, xarici sərmayədarlar qoyduqları investisiyanı tez götürsünlər. Bu, sonrakı dövrlərdə imkan verdi ki, neftin satışından əldə olunan gəlirlərin böyük hissəsi Azərbaycana qalsın. Həmçinin, ötən illər ərzində çəkilən neft və qaz boru kəmərləri, o cümlədən neft gəlirlərinin bir hissəsinin Neft Fondunda saxlanması təcrübəsi sözügedən ölkə üçün maraqlı ola bilər. Fikrimcə, bu yöndə Azərbaycanla Peru arasında faydalı təcrübə mübadiləsi aparıla bilər".
Vidadi ORDAHALLI
