Nüsrət İbrahimli: "Daxildə tikinti materiallarını istehsal etmək imkanı varsa, bu mallar niyə xaricdən idxal olunmalıdır?"
Tikinti materialları sahəsində fəaliyyət göstərən müəssisələr tərəfindən istehsal edilmiş məhsulun ümumi dəyəri 38,3 faiz artaraq 297,3 milyon manat təşkil edib. Dövlət Statistika Komitəsinin göstəricilərinə əsasən, sementin istehsalı 24,1 faiz, betondan yığma tikinti konstruksiyaların istehsalı 3 dəfə, şüşə lifindən ipliyin istehsalı 6,5 dəfə artıb.
Qeyd edək ki, hörmə üçün hazır beton qarışığının istehsalında 34,3 faiz artım müşahidə edilib.
Ekspertlərin fikrincə, tikinti materiallarının istehsalının artması gözləniləndir.
Tikinti materialları istehsalının 40 faizədək artması barədə fikir bildirən daşınmaz əmlak məsələləri üzrə ekspert Nüsrət İbrahimli "Bakı-Xəbər"ə açıqlamasında artımın gözlənilən olduğunu qeyd etdi. Onun sözlərinə görə, idxal olunan tikinti materiallarında manatın xarici valyutaya nisbətən məzənnəsinin dəyişməsindən sonra qiymət artımı baş verib. Qiymətin bahalaşması təbiidir. Belə olan halda, daxildə tikinti materiallarının istehsalının artımı qaçılmazdır: "Devalvasiyadan əvvəlki qiymətlərlə hazırkı qiymətləri müqayisə edəndə yerli istehsal olan materialların qiymətinin stabil qaldığını müşahidə etmək olar. Ancaq idxal olunan tikinti materiallarının hər birinin qiyməti artıb. Daxildə tikinti materiallarını istehsal etmək imkanı varsa, niyə bu mallar xaricdən idxal olunmalıdır? Adıçəkilən materialların istehsalının artmasının əsas səbəbi elə daxildə tikinti məhsullarının istehsal olunması ilə bağlıdır".
Həmsöhbətimizin sözlərinə görə, yaxın müddət ərzində istehsal olunan tikinti materiallarının həcmi daha da arta bilər. Təbii ki, bu, tikintinin həcmindən asılıdır: "Tikintinin həcmi 2015-2016-cı illərə nisbətən artarsa, tikinti materiallarının həcmi qeyd olunan rəqəmdən daha da yüksək olar".
Günel CƏLİLOVA
