Xəyal Məmmədxanlı: "Fermerlər sığorta şirkətlərinə onların aqrar məhsulunun sığortalanması üçün müəyyən məbləğdə vəsait verəcəksə, onda hər hansı bir fondun yaranmasına ehtiyac yoxdur"
Ölkədə aqrar sığorta fondunun yaradılması təklif olunur. Belə bir təkliflə Kənd Təsərrüfatının İqtisadiyyatı Elmi-Tədqiqat İnstitutunun direktor müavini Rofət Hüseynəliyev çıxış edib. O qeyd edib ki, ölkədə kənd təsərrüfatı sığortası fondunun və kənd təsərrüfatı kreditlərinin zəmanəti (və ya təminatı) fondunun yaradılması məqsədəuyğun olardı.
Onun sözlərinə görə, sığorta fondunun fəaliyyət istiqamətlərinə bağlanmış sığorta müqavilələrinin uçotunun aparılması, sığortalılar tərəfindən ödəniləcək sığorta haqlarının vaxtında ödənilməsinə nəzarət edilməsi, risqlərin daxili və ya xarici təkrar sığortaçılara təkrar sığortaya verilməsi, habelə bu məqsədlə müvafiq danışıqların reallaşdırılması, sığorta hadisəsi nəticəsində dəyən zərər məbləğinin vaxtında müəyyənləşdirilməsi, fond vəsaitlərinin müvafiq qaydada investisiya məqsədilə istifadəsinin təşkili, kənd təsərrüfatı məhsulları istehsalçılarını məlumatlandırmaq üçün əhali arasında reklam-təbliğat tədbirlərinin həyata keçirilməsi və s. aid edilə bilər.
R.Hüseynəliyevin fikrincə, sığorta fondunun sərmayəçiləri əməkdaşlıq əsasında formalaşdırıla bilər.
Sığorta məsələləri üzrə ekspert Xəyal Məmmədxanlı "Bakı-Xəbər"ə açıqlamasında qeyd etdi ki, aqrar sığorta fondunun yaradılması zəruridir. Ancaq bu fondun hansı şəkildə yaranacağı müəmmalıdır: "Aqrar sığorta fondu dövlət vəsaiti hesabına yaranacaqsa, o zaman belə bir qurumun yaradılması əhəmiyyətlidir.
Yox, sığorta şirkətləri ilə fermerlərin öz istəkləri hesabına yaranacaqsa, bunun kənd təsərrüfatı məhsullarının sığortasına heç bir təsiri olmayacaq. Kənd təsərrüfatı ilə məşğul olan şəxslərin öz istəklərinə və öz büdcələrinə uyğun olaraq belə bir fond yaratması düzgün deyil. Bu fonda dövlətin heç bir dəstəyi və dotasiyası olmayacaqsa, icbari kənd təsərrüfatı fonduna heç bir ehtiyac yoxdur. Nəzərə almaq lazımdır ki, dövlət tərəfindən yaranacaq sığorta fonduna müəyyən yardımlar ayrılacaq və daim nəzarət olacaq. Fermerlər sığorta şirkətlərinə onların aqrar məhsulunun sığortalanması üçün müəyyən məbləğdə vəsait verəcəksə, onda hər hansı bir fondun yaranmasına ehtiyac yoxdur".
Günel CƏLİLOVA
