Ruslan Atakişiyev: "Bankın uzun illərə dayanan təcrübəsi və digər faktorlar bu qənaətə gəlməyə əsas verir"
"Dünya Bankı (DB) Azərbaycan hökumətinə özəl sektorun kreditləşdirilməsi üzrə yeni mexanizm hazırlamağa kömək etməyə hazırdır". Bunu mətbuata müsahibəsində bankın Azərbaycan Nümayəndəliyinin rəhbəri Navid Hassan Naqvi deyib. Onun fikrincə, hökumət biznesin kreditləşdirilməsi ilə məşğul olmamalıdır: "Ümumilikdə, maliyyə sektoru kreditləşdirmə haqqında qərarı müstəqil olaraq özü qəbul etməlidir".
N.Hassan bildirib ki, sağlamlaşdırma prosesinin başlamasınadək Azərbaycan Beynəlxalq Bankının payına ölkənin bank sektorunun bütün aktivlərinin təqribən 35 faizi düşürdü: "Lakin bankın aktivlərlə bağlı ciddi problemi oldu. ABB-nin belə problemlə qarşılaşması səbəblərindən biri o idi ki, müvafiq qərarı (kredit ayrılması barədə - red.) hökumət deyil, özəl sektor qəbul etməlidir".
N.H.Naqvi qeyd edib ki, Dünya Bankı, o cümlədən DB qrupuna daxil olan Beynəlxalq Maliyyə Korporasiyası vasitəsilə Azərbaycan hökumətinə özəl sektorun kreditləşdirilməsi üzrə yeni mexanizmin hazırlanması üçün kömək etməyə hazırdır.
Ümumilikdə bu nə deməkdir? Ekspertlər bunu necə dəyərləndirirlər?
Sözügedən məsələ ilə bağlı fikirlərini "Bakı-Xəbər"lə bölüşən İqtisadi Resursların Öyrənilməsi Mərkəzinin direktoru Ruslan Atakişiyev buna bir neçə kontekstdən yanaşdı: "Bütövlükdə götürəndə Dünya Bankı Azərbaycanda özəl sektorun kreditləşdirilməsində, ölkədə sahibkarlıq mühitinin inkişafı ilə bağlı bir sıra layihələrin icrasında iştirak edib. Ümumilikdə, bu tip beynəlxalq qurumların, xüsusən də beynəlxalq maliyyə institutlarının özəl sektorun maliyyələşdirilməsində iştirak etməsinin bir sıra müsbət tərəfləri var. Onlardan biri də maliyyə vəsaitinin verilməsi ilə yanaşı, müasir idarəçilik biliklərinin transfer olunması, biznes əlaqələrinin genişləndirilməsidir. Yəni biznesə lazım olan marketinklik, satış menecmentliyi, xüsusən də beynəlxalq standartların tətbiqinin genişlənməsi baxımından əhəmiyyət daşıyır. O baxımdan hesab edirəm ki, Dünya Bankı özəl sektorun kreditləşdirilməsi ilə bağlı yeni mexanizmin hazırlanmasına yaxından kömək edə bilər. Bankın uzun illərə dayanan təcrübəsi və digər faktorlar bu qənaətə gəlməyə əsas verir".
Vidadi ORDAHALLI
