Zakir Əhmədov: "Bu ümumi işin xeyrinədir"
"Azərbaycanda neftdən asılılığın aradan qaldırılması istiqamətində mühüm tədbirlər görülür". Bunu Milli Məclisin plenar iclasında maliyyə naziri Samir Şərifov deyib. Onun sözlərinə görə, hökumət tərəfindən yeni fiskal qaydaların hazırlanması istiqamətində də işlər davam etdirilir.
Bundan başqa, maliyyə naziri əlavə edib ki, dövlət borcunun idarə olunması ilə bağlı strategiya hazırlanır. "Bu sənədlər ölkədə iqtisadi sabitliyin qorunması, xarici şokların qarşısının alınması və neytrallaşdırılmasına xidmət edəcək", - deyə o vurğulayıb.
O da məlumdur ki, dövlət borcları daxili və xarici olmaqla qruplaşdırılır. Azərbaycanda xarici dövlət borcları ilə bağlı elə bir problem yoxdur. Ona görə ki, xarici dövlət borcunun ÜDM-də payı 10 faiz olmaqla, Azərbaycan hətta Mərkəzi-Şərqi Avropa ölkələrində ən yaxşı göstəriciyə malikdir. Maliyyə Nazirliyinin yanında dövlət borcunun idarə edilməsi ilə bağlı bir agentlik də fəaliyyət göstərir. Bu qurumun əsas funksiyası dövlət borcunun idarə edilməsi və borcun ödənilməsi ilə bağlı metodların işlənib hazırlanması, həyata keçirilməsi, eyni zamanda, qiymətli kağızların emisiyası, eləcə də digər metodlarla bu borcların ödənilməsidir.
Bütün hallarda, dövlət borcunun idarə olunması ilə bağlı strategiyanın hazırlanmasına ekspertlər necə yanaşır? Sözügedən məsələni dəyərləndirən ekspert Zakir Əhmədovun fikrincə, bu sahədə yeni strategiyanın hazırlanması ümumi işin xeyrinədir: "Məsələ ondadır ki, dövlət borcunun ÜDM-də payı azdır. Ancaq bundan fərqli olaraq daxili borc, xüsusən qarşılıqlı borclanma ilə bağlı bir sıra çətinliklər var. O üzdən, bu sahədə borclanmanın idarə edilməsinin güclənməsinə ehtiyac var. Həmçinin, xarici borcların da idarə edilməsinin təkmilləşməsi vacibdir. Belə olan halda, idarəetmədə çevikliyin artmasına əlavə imkan yaranacaq. Bu da, öz növbəsində, digər problemlərin həllinə müsbət təsir edəcək. O üzdən, bu ümumi işin xeyrinədir. Ümumən borclanmanın idarə edilməsində yeni bir strategiyanın hazırlanması və qəbul olunması indiki məqamda Azərbaycan üçün vacibdir. Limit yüksək olmasa da, nəzərə almaq lazımdır ki, dünya bazarında neftin qiyməti aşağı düşür. Gələcəkdə Azərbaycanın müəyyən vəsaitlərin ödənilməsi üçün əlavə xarici borclanmaya getmək zərurəti yarana bilər. Strategiyanın hazırlanması imkan verəcək ki, daha əlverişli borclar cəlb edilsin. Xərclərin azaldılması da bu yolla mümkün ola bilər".
Vidadi ORDAHALLI
