Natiq Cəfərli: "Palata və Mərkəzi Bank kapitallaşma səviyyəsi aşağı olan bankların bağlanmasını yox, birləşdirilməsini istəyir"
"Kapitalla bağlı problemi olan 5 bank xüsusi nəzarət altındadır, ilin ortasına qədər onlar problemi həll etməlidir". Bu sözləri Bakıda "İqtisadi islahatlar: Əldə edilmiş nəticələr və tövsiyələr" mövzusunda keçirilən konfransda çıxış edən Maliyyə Bazarlarına Nəzarət Palatası (MBNP) direktorlar şurasının sədri Rüfət Aslanlı deyib.
O qeyd edib ki, Azərbaycan manatının 2015-ci ildə ikili devalvasiyası ötən il bank sektorunda qeyri-işlək kreditlərin həcminin artması, banklardan əmanətlərin çıxarılması ilə nəticələnib: "Vəziyyəti düzəltmək üçün Azərbaycanda bank sektorunun sağlamlaşdırılması istiqamətində tədbirlər görülüb, kapitalla bağlı problemi olan banklar sistemdən kənarlaşdırılıb, banklardakı əmanətlər 100 % sığortalanıb. Hazırda kapitalla bağlı problemi olan 5 bank xüsusi nəzarət altındadır, ilin ortasına qədər onlar kapitallaşma ilə bağlı problemi həll etməlidir. Paralel olaraq Azərbaycan Beynəlxalq Bankının sağlamlaşdırılması davam etdirilir, onun xarici öhdəlikləri restrukturizasiya edilir. Banklarda kredit portfelinin keyfiyyəti stabilləşib".
Məsələ ilə bağlı fikir bildirən iqtisadçı-ekcpert Natiq Cəfərli "Bakı-Xəbər"ə açıqlamasında qeyd etdi ki, kapitallaşma ilə bağlı problemi olan banklar əsasən kiçik banklardır: "O banklar arasında kapitallaşması və dövriyyəsi iri olan bank "AtaBank"dır. Beş bankdan birinin "AtaBank" olmasının ehtimalı yüksəkdir. Həmin banklar kapitallaşma ilə bağlı problemi həll edə bilməsə, təsisçilər tərəfindən banklar saxlana bilməsə, onlar ya bağlanmalı, ya da birləşdirilməlidir. Çox güman ki, bu iki yoldan biri seçiləcək. Maliyyə Bazarlarına Nəzarət Palatası və Mərkəzi Bank bankların bağlanmasını yox, birləşdirilməsini istəyir. Ancaq unutmaq lazım deyil ki, birləşdirilməyin də tərəfi var. İki bank birləşərkən tək onların aktivi yox, həm də borcları birləşir. Bu səbəbdən də bankların birləşməsi çox ağır gedəcək. Amma bankların bağlanma ehtimalı daha yüksəkdir".
Günel CƏLİLOVA
