Vüqar Qədirov: "İş adamları da görür ki, onların bu istiqamətdə atdığı addımlar nəzərdən kənar qalmır və ən yüksək səviyyədə təqdir olunur"
Mayın 30-da Bakı şəhərinin Qaradağ rayonunda məcburi köçkünlər üçün yaşayış kompleksinin təməlqoyma mərasimi keçirilib. Azərbaycan Respublikasının Birinci vitse-prezidenti Mehriban Əliyeva mərasimdə iştirak edib.
M.Əliyeva bildirib ki, Bakı və Sumqayıt şəhərlərində yararsız, qəzalı vəziyyətdə olan binalarda hələ də minlərlə insan yaşayır. Mart ayında bu problemə həsr olunan müşavirədə birinci mərhələdə ən qəzalı binalarda yaşayan 4 min ailənin köçürülməsi üçün tədbirlər planının hazırlanması tapşırığının verildiyini xatırladan Birinci vitse-prezident hazırda bu plana uyğun olaraq Abşeron rayonunun Masazır qəsəbəsində 3 binanın, Sabunçu rayonunun Ramanı qəsəbəsində 1 binanın, Sumqayıt şəhərində 5 binanın inşa edildiyini, digər 5 binanın inşası üçün isə yerin ayrıldığını söyləyib:
"Bu gün təməli qoyulan müasir yaşayış kompleksi ölkəmizin özəl sektorunun həmin bu nəcib işə töhfəsidir. Hesab edirəm çox gözəl bir haldır ki, dövlətlə yanaşı, iş adamları, sahibkarlar da bu məsələyə dəstəyini verməyə hazırdırlar".
M.Əliyeva, faktiki olaraq, sahibkarları məcburi köçkünlərin sosial problemlərinin həllində iştiraka ruhlandıran bir çıxış edib. Bunu necə dəyərləndirmək olar?
"Qaçqın və məcburi köçkün gəncləri" İctimai Birliyinin sədri Vüqar Qədirov qəzetimizə açıqlamasında bildirdi ki, Mehriban xanımın bu nəcib təşəbbüsünü tam olaraq dəstəkləyirik: "O, Birinci vitse-prezident təyin edilən kimi keçirdiyi ilk tədbir məhz qaçqın və məcburi köçkünlərin mənzil şəraitinin yaxşılaşdırılmasına həsr olundu. Üstündən qısa müddət keçəndən sonra da gördük ki, Mehriban xanım bu məsələni öz diqqətində saxlayır. Biz təşkilat olaraq bilirik ki, Bakı və Sumqayıtda ağır mənzil şəraiti olan köçkünlər var. Onlara dövlət yer versə də, şəraitləri ağırdır. Təbii ki, Azərbaycan dövləti bu istiqamətdə analoqu olmayan layihələr həyata keçirib və hazırda qaçqınların böyük əksəriyyətinin mənzil problemi həllini tapıb. Regionlarda böyük şəhərciklər salınıb. Bakı və Sumqayıtla bağlı məsələni isə Mehriban xanım öz diqqətində saxlayır. Doğru olaraq vurğulanıb ki, bu işdə özəl sektor da yaxından iştirak etməlidir. Bütün problemləri dövlətin üstünə atmaq olmaz. Mehriban xanımın son çıxışı iş adamlarına bu cür sosial layihələrdə yaxından iştirak üçün əlavə stimul verəcək. İş adamları da görür ki, onların bu istiqamətdə atdığı addımlar nəzərdən kənar qalmır və ən yüksək səviyyədə təqdir olunur".
Məhəmmədəli QƏRİBLİ
