Əli Əlirzayev: "Maksimum çalışmaq lazımdır ki, mövcud imkanlardan səmərəli istifadə edilsin"
"Azərbaycan iqtisadiyyatı rəqabətqabiliyyətliliyinə görə dünyada 37-ci yerdədir. Baxmayaraq ki, beynəlxalq maliyyə böhranı bizə də təsir etdi. Baxmayaraq ki, neftin qiymətinin aşağı düşməsi təbii ki, gəlirlərimizə mənfi təsir etdi. Artıq Azərbaycan iqtisadiyyatı mövcud vəziyyətə adaptasiya olundu, milli valyutamız sabitləşdi, qeyri-neft ixracımız artır".
Bunu Prezident İlham Əliyev Respublika Günü münasibətilə keçirilən rəsmi qəbulda deyib. Onun sözlərinə görə, bu ilin son dörd ayının iqtisadi göstəriciləri müsbətdir. O bunu bir sıra konkret faktlarla əsaslandırıb: "Dörd ayın iqtisadi göstəriciləri çox müsbətdir. Bizim valyuta ehtiyatlarımız, ticarət dövriyyəsi artıb. Ticarət dövriyyəsində müsbət saldo 1,2 milyard dollara çatıb. Ticarət dövriyyəsi 11 faiz, ixrac 41 faiz, qeyri-neft ixracı 22 faiz, kənd təsərrüfatı ixracı 44 faiz artıb. Azərbaycanda bugünkü maliyyə və iqtisadi vəziyyət sabitdir, dayanıqlıdır. Bütün büdcə proqnozları yerinə yetirilir. Mən nə bu il, nə gələn il ölkə iqtisadiyyatı üçün heç bir problem görmürəm. Xüsusilə nəzərə alsaq ki, bizim valyuta ehtiyatlarımız da artır, bu il də artıb. Valyuta ehtiyatlarımız xarici borcdan 4-5 dəfə çoxdur. Ona görə istənilən ölkə, bax, bu vəziyyəti özü üçün arzulaya bilər"
Görünən odur ki, aparılan məqsədyönlü və sistemli siyasət öz bəhrəsini verir. İqtisadi sahədə aparılan islahatlar nəticəsində bu sektorda artım templəri müşahidə olunur. Bütövlükdə, Prezidentin bununla bağlı səsləndirdiyi fikirlərə münasibət necədir? Məsələyə münasibət bildirən iqtisadçı-alim Əli Əlirzayevin sözlərinə görə, ümumən vəziyyət qənaətbəxş olsa da, müəyyən qabaqlayıcı addımlar atılmalıdır: "Problem həmişə var, amma bunun həlli yolları da var. Çünki problem olmasa, o zaman ölkə inkişaf edə bilməz. Hesab edirəm ki, müəyyən qabaqlayıcı tədbirlərin görülməsi ümumi iqtisadi vəziyyətin xeyrinədir. Maksimum çalışmaq lazımdır ki, mövcud imkanlardan səmərəli istifadə edilsin. Görünən odur ki, iqtisadiyyatda geriləmə halları arxada qalıb. Ölkədə iqtisadi problemləri həll etmək üçün müəyyən imkanlar var. İqtisadi artım, sabitlik, vəsait, tarazlıq var. Prezident çıxışı zamanı məhz bu amili xüsusi qeyd etdi. Hesab edirəm ki, ölkədə iş yerlərinin sayını daha da artırmalıyıq. İxracat potensialını artırmaq üçün sahibkarlığı inkişaf etdirmək lazımdır. Daxili bazarda qiymətin qalxmaması üçün məhsul bolluğu yaratmaq lazımdır. O üzdən, bu istiqamətdə ölkədə atılan addımlar və bunların daha da dərinləşdirilməsi vacibdir. Bütün bunların kompleks şəkildə həyata keçirilməsi hesab edirəm ki, iqtisadi inkişafa təkan verəcək".
Vidadi ORDAHALLI
