Zakir Əhmədov: "Düşünürəm ki, müddət uzadılacaq"
Azərbaycanda sahibkarlıq fəaliyyətinin yoxlanmasına moratoriumun uzadılması imkanları müzakirə olunur. Bunu "İqtisadi islahatlar: nəticələr və tövsiyələr" mövzusunda keçirilən konfrans zamanı iqtisadiyyat nazirinin müavini Sahil Babayev deyib.
Onun sözlərinə görə, hazırda bu məsələ ilə bağlı yekun qərar mövcud deyil. Nazir müavininin açıqlamasından o da məlum olub ki, Azərbaycanda sahibkarlıq fəaliyyətinin yoxlanılması min dəfədən çox azalıb. Belə ki, son 19 ay ərzində cəmi 89 yoxlama həyata keçirilib. Daha əvvəl analoji dövr ərzində isə keçirilən yoxlamaların sayı 99 minə bərabər olub.
Qeyd edək ki, ölkə başçısı İlham Əliyev "Sahibkarlıq sahəsində aparılan yoxlamaların dayandırılması haqqında" 20 oktyabr 2015-ci ildə Fərman imzalayıb. Fərmanla "Sahibkarlıq sahəsində aparılan yoxlamaların dayandırılması haqqında" Azərbaycan Respublikasının Qanununa əsasən, insanların həyat və sağlamlığına, dövlətin təhlükəsizliyinə və iqtisadi maraqlarına mühüm təhlükə yaradan hallar üzrə aparılmasına yol verilən yoxlamaların siyahısı təsdiq edilib.
Ötən müddət ərzində bu amil sahibkarlığın inkişafına müsbət təsir göstərdi. O üzdən, bunun uzadılması zərurəti ortaya çıxıb. Maraqlıdır, ekspertlər buna necə yanaşır? Müddətin uzadılmasına ehtiyac var, yoxsa yox? Məsələyə münasibət bildirən ekspert Zakir Əhmədovun sözlərinə görə, buna ehtiyac var. O bunu bir sıra faktorlarla əsaslandırdı: "Əvvəla ötən illərin təcrübəsi göstərdi ki, sahibkarlıq sahəsində yerli-yersiz yoxlamalar bu və ya digər dərəcədə sahibkarlığın inkişafına mənfi təsir göstərir. Elə sahələr var ki, orada aparılan yoxlamalar, ümumiyyətlə, azad sahibkarlığın inkişafını tormozlayır. Artıq neçə müddətdir ölkədə qeyri-neft sektorunun müxtəlif sahələrinin inkişaf etdirilməsi prioritet məsələdir. Bu aspektdən yanaşanda, əlbəttə ki, sahibkarlıq fəaliyyətinin yoxlanmasına moratoriumun uzadılması vacibdir. Ən azından, indiki dövrün iqtisadi reallıqları bunu tələb edir. Biz maksimum çalışmalıyıq ki, ölkədə sahibkarlıq inkişaf etsin. Sahibkarlığın inkişafı daha çox iş yerinin açılması, məşğulluq səviyyəsinin artması deməkdir. O üzdən, buna böyük ehtiyac var. Çoxşaxəli iqtisadiyyatın formalaşdırılması üçün bu vacibdir. Düşünürəm ki, müddət uzadılacaq".
Vidadi ORDAHALLI
