Əli Əlirzayev: "Əsas diqqət gəlir gətirən sahələrə yönəldilməlidir"
Milli Məclisin İqtisadi siyasət, sənaye və sahibkarlıq komitəsinin iclası keçirilib. İclasda "2016-cı il üçün dövlət büdcəsinin icrası haqqında" qanun layihəsi və dövlət büdcəsinin icrasına dair illik hesabat müzakirə olunub.
Müzakirə zamanı çıxış edən iqtisadiyyat nazirinin müavini Sevinc Həsənova bildirib ki, büdcə konsolidasiya tədbirlərinin və sərt pul siyasətinin həyata keçirildiyi bir şəraitdə iqtisadi fəallığın və məşğulluğun təmin edilməsi məqsədilə ölkə iqtisadiyyatına yerli və xarici maliyyə resurslarının cəlb edilməsi və tədiyə balansının tarazlığının təmin edilməsi üçün dövlətin təşviq mexanizmlərinin tətbiqinin əhəmiyyəti daha da artıb. Onun sözlərinə görə, bununla əlaqədar ötən ildən tətbiq olunan investisiya təşviqi mexanizmi özəl investisiyanın artımına ciddi töhfə verib. "Ötən il 79 sahibkarlıq subyektinə 84 investisiya təşviqi sənədi təqdim olunub ki, bu layihələrin reallaşdırılması nəticəsində yerli istehsala 1 mlrd. manatdan çox investisiya yatırılacaq. 6700-ə yaxın yeni iş yeri yaradılacaq. Təqdim edilmiş layihələrin 45 %-i kənd təsərrüfatı, 55 %-i isə sənaye sahələrində olmaqla, onların 40 %-i Bakıətrafı qəsəbələrin və Abşeron rayonunun, 60 %-i isə regionların payına düşür ki, bu da regional inkişafa öz təsirini göstərəcək".
Yerli istehsalın inkişafı ilə bağlı 1 milyarddan çox investisiyanın yatırılması ilə bağlı fikir bildirən iqtisadçı-ekspert Əli Əlirzayev "Bakı-Xəbər"ə açıqlamasında bunları qeyd etdi: "Yerli istehsalın inkişafı ilə bağlı bir neçə sahəyə investisiya yatırılması gözlənir. Əsasən turizm sahəsinə yatırım olunmalıdır. Çünki turizm gəlirli sahədir. Hazırda tələbat olan sahə məhz turizmdir. Turizmə nə qədər çox vəsait yatırılırsa, ondan əldən olunan gəlir bir o qədər çox olur. Həmçinin, infrastrukturun inkişafına da investisiya yatırılmalıdır".
Həmsöhbətimiz onu da əlavə etdi ki, aqrar sahənin inkişafına hazırda dövlət tərəfindən xüsusi diqqət və qayğı göstərilir: "Əsasən pambıqçılığın inkişafı prioritet məsələ kimi qarşıya qoyulub. Kənd təsərrüfatının müxtəlif sahələrinin inkişafı üçün investisiya qoyulur. Yaxın illər ərzində qoyulan sərmayə öz bəhrəsini verəcək".
İqtisadçının sözlərinə görə, yerli istehsalın inkişafı üçün 1 milyarddan çox vəsait yatırılıb. Əsas diqqət gəlir gətirən sahələrə yönəldilməlidir".
Günel CƏLİLOVA
