Mayın 24-də "Boulvard Hotel"də Birinci Bakı Şoppinq Festivalın yekunlarına həsr olunmuş mükafatlandırma mərasimi keçirilib.
Baki-xeber.com-a Nazirlikdən verilən məlumata görə, tədbirdə çıxış edən Azərbaycan Respublikasının mədəniyyət və turizm naziri Əbülfəs Qarayev ilk festivalın uğurla başa çatdığını bildirib. Qeyd edib ki, təkcə ölkəmizdə deyil, regionda ilk dəfə olaraq keçirilən bu festival Azərbaycan Respublikası Prezidentinin müvafiq sərəncamı ilə təsdiq olunmuş turizmin inkişafına dair Strateji Yol Xəritəsinə uyğun olaraq təşkil edilib.
İlk festivalın böyük əks-səda doğurduğunu bildirən nazir qeyd edib ki, növbəti şoppinq festivalının vaxtı və proqramı yaxın günlərdə elan ediləcək. İlin sonuna yaxın keçirilməsi planlaşdırılan ikinci festivala 500-dən çox mağazanın qoşulması və "Tax Free" sisteminin müddətinin uzadılması nəzərdə tutulur.
Tədbirdə nazir Əbülfəs Qarayev Birinci Bakı Şoppinq Festivalının təşkilatçılarına nazirliyin mükafatlarını təqdim edib. Festivalın yüksək səvyyədə təşkilinə görə Azərbaycan Konqreslər Bürosunun direktoru Ülviyyə Mirqasımova "Fəxri turizm işçisi" döş nişanı ilə təltif edilib.
Bundan başqa, Büronun əməkdaşlarından Söhrab Fərhadov, Fəridə Axundova, Nigar Nəzərova, Firuzə Mirzəyeva, Fərizə Qasımzadə, Sevda Ömərova, Dinara Yusufova və Aytəkin Quliyeva isə Birinci Bakı Şoppinq Festivalının təşkilindəki fəallıqlarına görə Mədəniyyət və Turizm Nazirliyinin Fəxri Fərmanına layiq görülüb.
Tədbirdən sonra Azərbaycan Konqreslər Bürosunun direktoru Ülviyyə Miqrasımova festivalın rəsmi saytına (www.bakushopfest.com) açıqlama verərək nazirlik tərəfindən "Fəxri turizm işçisi" adına layiq görülməsini və büronun bir qrup əməkdaşının nazirliyin fəxri fərmanı ilə təltif edilməsini rəhbərlik etdiyi kollektivin işinə verilən yüksək qiymət olduğunu bildirib. Ü.Mirqasımova göstərilən etimada görə Mədəniyyət və Turizm Nazirliyi rəhbərliyinə və şəxsən nazir Əbülfəs Qarayevə minnətdarlığını bildirib.
Qeyd edək ki, hər il təşkil ediləcək Bakı Şopinq Festivalı ilk dəfə bu il aprelin 10-dan mayın 10-dək Azərbaycan paytaxtında keçirilib. Növbəti festivalın keçirilməsi bu ilin sonuna nəzərdə tutulub. Azərbaycan Respublikasının Prezidenti İlham Əliyevin 1 sentyabr 2016-cı il tarixli sərəncamı ilə təsdiq edilmiş, "Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi"nə əsasən hər il keçiriləcək şoppinq festivallarının təşkili Azərbaycan Respublikası Mədəniyyət və Turizm Nazirliyinin nəzdində Konqreslər Bürosuna həvalə edilib.
