Vüqar Bayramov: "Bu festivalın əhəmiyyəti ilə bağlı mağaza rəhbərlikləri maarifləndirilməlidir"
Aprelin 10-dan mayın 10-dək Azərbaycanda ilk dəfə olaraq Ticarət Festivalı (Bakı Şoppinq Festivalı) təşkil olundu. Prezident İlham Əliyevin 2016-cı il 1 sentyabr tarixində imzaladığı "Azərbaycan Respublikasında turizmin inkişafı ilə bağlı əlavə tədbirlər haqqında" Sərəncama əsasən keçirilən festivalın təşkilatçısı Mədəniyyət və Turizm Nazirliyinin nəzdində fəaliyyət göstərən Azərbaycan Konqreslər Bürosu idi.
Şoppinq Festivalının yekunları ilə bağlı bir neçə gün öncə mətbuat konfransı keçirildi. Qeyd olundu ki, aprel ayında keçirilən festival müddətində 205 mağaza iştirakçı kimi qeydiyyatdan keçib və onlardan 172-si ƏDV qaytarma proqramına qoşulub. Festivalın "Tax-free" sistemi çərçivəsində 23 242 ədəd hesab-faktura verilib. Təsdiqlənmiş fakturalar üzrə ümumi dövriyyə 18,168 mln. manat təşkil edib və banklar alıcılara 1,8 mln. manat məbləğində ƏDV qaytarıb.
Onu da qeyd edək ki, Bakıda Şoppinq Festivalı il ərzində iki dəfə keçiriləcək. Məlumat üçün bildirək ki, növbəti festival oktyabr ayında təşkil olunacaq.
Keçiriləcək növbəti festivallarda qeydiyyatdan keçəcək mağazaların sayının daha çox olması üçün nə etmək lazımdır?
Məsələ ilə bağlı fikir bildirən iqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, Şoppinq Festivalına turistlərin daha çox cəlb olunması satış və dövriyyənin genişlənməsi baxımından vacibdir: "Ticarət Festivalına daha çox mağazanın cəlb olunmasına nail olmaq lazımdır. İlk dəfə keçirilən festivala 205 mağazanın cəlb olunması elə də kiçik rəqəm deyil".
Həmsöhbətimiz hesab edir ki, növbəti festival müddətində daha çox mağazanın bu tədbirə qoşulması üçün onların məlumatlandırılmasına ehtiyac var: "Daha çox mağaza Şoppinq Festivalına qoşularsa, bu onlarda satışı artırar. Belə olan halda, həmin mağazaların əldə etdikləri gəlirin həcmi də yüksək olar. Bu baxımdan mağazaların Ticarət Festivalı ilə bağlı məlumatlandırılması olduqca vacibdir".
Müsahibimiz onu da əlavə etdi ki, oktyabr ayında keçiriləcək Şoppinq Festivalına daha çox mağazanın qoşulması üçün infrastrukturun genişləndirilməsinə ehtiyac var: "Yəni daha geniş infrastruktur formalaşdırılmalıdır ki, Şoppinq Festivalına maneçilik törədilməsin. Amma, bütün hallarda, ümid edirəm ki, mağazaların sayının artırılması üçün ən vacib məqam olan məlumatlandırma kampaniyaları genişləndiriləcək. Bu festivalın əhəmiyyəti ilə bağlı mağaza rəhbərlikləri maarifləndirilməlidir".
Günel CƏLİLOVA
