Zakir Əhmədov: "Maksimum çalışmalıyıq ki, qeyri-neft sektorunun tərkib hissəsi olan xidmət sektoru inkişaf etsin"
Bu ilin axırına qədər Bakı Şoppinq Festivalı nəticəsində büdcəyə 40-50 milyon vəsaitin daxil olmasına nail olacağıq. Bu sözləri jurnalistlərə mayın 24-də Bakı Şoppinq Festivalının yekunlarına həsr olunmuş mətbuat konfransında mədəniyyət və turizm naziri Əbülfəs Qarayev deyib.
Nazirin sözlərinə görə, ümumən festivalın keçirilməsinə cəmi 700 min manat vəsait xərclənib: "Ümumi büdcə 1 milyon manatı keçməyib. Sevindirici haldır ki, ölkəmizdə gerçəkləşən festival beynəlxalq və yerli medianın geniş müzakirə mövzusuna çevrilib. Bakı Şoppinq Festivalının marketinqi, dünya mediasında işıqlandırılması və təbliğatı sahəsində də mühüm işlər görülüb. Belə ki, ölkəmiz də daxil olmaqla, ümumilikdə 54 ölkədə TV, radio, onlayn media, sosial şəbəkələr və internet televiziyası vasitəsilə festival haqqında məlumatlar yayılıb. Xüsusi olaraq sosial şəbəkələrdə festival barədə informasiyaları milyonlarla insan izləyib".
Nazir əlavə edib ki, növbəti Şoppinq Festivalı üçün bu gündən etibarən hazırlıqlara başlanacaq.
Vergilər nazirinin müavini Sahib Ələkbərov festivalın əhəmiyyətindən danışaraq qeyd edib ki, beynəlxalq təcrübənin öyrənilməsi və tətbiq edilməsi yolu ilə həyata keçirilən bu əhəmiyyətli layihə ilk dəfədən etibarən ölkəmizdə turizmin inkişafı, ticarətin, habelə pərakəndə satışın genişlənməsi baxımından uğurlu olub.
Hər halda, bu kimi tədbirlərin timsalında ölkəyə daxil olan vəsaitlərin artan xətt üzrə inkişafı müsbət tendensiyadır. Bu, ölkədə qeyri-neft sektorunun inkişaf etməsinin göstəricisidir.
Sözügedən məsələ ilə bağlı fikirlərini "Bakı-Xəbər"lə bölüşən ekspert Zakir Əhmədovun sözlərinə görə, nazirin verdiyi proqnozlar reallığı əks etdirir: "Hətta ola bilər ki, Bakı Şoppinq Festivalı nəticəsində büdcəyə daxil olan vəsaitin həcmi bundan da çox olsun. Çünki ölkədə yay turizmi ərəfəsidir. Zatən, ilbəil gələn turistlərin sayında artım müşahidə olunur. Bundan başqa, bu il Azərbaycan bir sıra mühüm beynəlxalq tədbirlərə ev sahibliyi edib. Hələ bundan sonra da tədbirlərin keçiriləcəyi gözlənir. Bütün bunlar əlbəttə ki, bu və ya digər dərəcədə sözügedən festivaldan büdcəyə daha çox vəsait daxil olmasına öz təsirini göstərir. Hesab edirəm ki, bu çox yaxşı tendensiyadır. Ona görə də daha çox çalışmaq lazımdır ki, belə tədbirlərin sayı artsın. Biz maksimum çalışmalıyıq ki, qeyri-neft sektorunun tərkib hissəsi olan xidmət sektoru inkişaf etsin. Nəzərə almaq lazımdır ki, bu sektor gəlir gətirməklə yanaşı, əmək tutumludur. O üzdən, bu istiqamətdə görülən işlər təqdirəlayiqdir".
Vidadi ORDAHALLI
