Rəsul Cahangirli: "Azərbaycanın tranzit ölkə olaraq üstünlüyü artacaq"
Türkiyə prezidenti Rəcəb Tayyib Ərdoğan Türkiyə Gömrük və Ticarət Nazirliyi ilə Azərbaycan Dövlət Gömrük Komitəsi arasında gömrük məsələləri üzrə birgə komitənin yaradılması haqqında Anlaşma Memorandumunu təsdiq edib.
Məlumat üçün qeyd edək ki, memorandum 2015-ci il yanvarın 15-də Ankarada imzalanıb. Birgə komitə tərəflər arasında gömrük işi sahəsində, o cümlədən gömrük nəzarətinin səmərəliliyini artırmaq və tərəflər arasında mallar və nəqliyyat vasitələrinə dair məlumatları ötürməklə gömrük prosedurlarını asanlaşdırmaq üçün layihələrin həyata keçirilməsi üzrə əməkdaşlığı əlaqələndirəcək, əməkdaşlığın əsas sahələrini və istiqamətlərini müəyyən edəcək.
Komitənin iclasları növbə ilə Türkiyə və Azərbaycanda ildə bir dəfə keçiriləcək.
O da məlumdur ki, Türkiyə ilə Azərbaycan arasında iqtisadi-ticarət əlaqələri müxtəlif sahələri əhatə etdiyi üçün ilbəil genişlənir. Düzdür, dünyadakı məlum iqtisadi böhranla əlaqədər son illər iki ölkə arasında ticarət dövriyyəsində azalma var. Bunun da obyektiv səbəbləri var. Ancaq müşahidələr göstərir ki, iki ölkə arasında əlaqələr ümumilikdə inkişaf edən xətt üzrə genişlənir.
Maraqlıdır, gömrük məsələləri üzrə birgə komitənin yaradılması iki ölkənin iqtisadi əlaqələrinə nə kimi təkan verəcək? Məsələyə münasibət bildirən ekspert Rəsul Cahangirlinin sözlərinə görə, bu, ticarət əlaqələrinin genişlənməsinə xidmət edəcək: "Arzuolunandır ki, bu istiqamətdə işlər daha da sürətləndirilsin. Məsələ ondadır ki, birgə komitənin yaradılması gömrük prosedurlarını daha da sadələşdirəcək. Çünki ticarət dövriyyəsinin genişlənməsində, asanlaşmasında bu çox mühüm faktordur. Bu nəinki bizdə, dünyanın bir sıra inkişaf etmiş ölkələrində də belədir. Belə olduqda iş adamları qarşılıqlı sərmayə qoyuluşunda maraqlı olur. Daha çox məhsul ixrac edirlər və s. Bunun ən başlıca cəhətlərindən biri də ondan ibarətdir ki, Azərbaycanın tranzit ölkə olaraq üstünlüyü artacaq. Nəticədə tranzit daşımalardan daxil olan gəlirlərin həcmi artacaq. Bu da, öz növbəsində, Azərbaycanın iqtisadi baxımdan daha da inkişaf etməsinə müsbət təsir göstərəcək".
Vidadi ORDAHALLI
