Rüfət Quliyev: "İslam Həmrəyliyi Oyunlarının böyük əks-sədası sürətlə dünyaya yayılır"
Azərbaycanda turizm sektoru sürətlə inkişaf edir. Bu ilin ilk 3 ayında Azərbaycana 544 min turist gəlib ki, bu da 25 faiz artım deməkdir. Təkcə Novruz bayramı günlərində İrandan ölkəmizə gələn turistlərin sayı 65 min nəfərə yaxın olub.
Turistlərin sayının ildən-ilə artması təsadüfi deyil. Ölkənin dinamik inkişafı, şəhərlər və digər yaşayış məkanlarında müasir standartlara uyğun quruculuq və abadlıq işlərinin həyata keçirilməsi, ölkədə hökm sürən sabitlik və təhlükəsizlik, müasir turizm infrastrukturunun yaradılması, viza rejiminin sadələşdirilməsi və "ASAN viza" sisteminin tətbiqi, Azərbaycanın ardıcıl şəkildə mühüm beynəlxalq tədbirlərə ev sahibliyi etməsi, ölkəmizin dünyada müsbət imicinin formalaşması bu tendensiyaya səbəb olan amillərdir.
Həmçinin, ölkəmizdə keçirilən beynəlxalq əhəmiyyətli idman yarışları turist axınına təsir edir. Bu günlərdə ölkəmiz İslam Həmrəyliyi Oyunlarına ev sahibliyi etdi. Möhtəşəm şəkildə keçirilən bu yarış qüsursuz şəkildə yekunlaşdı və hər kəsin yaddaşında iz qoyacaq.
"Bakı-2017" İslam Həmrəyliyi Oyunlarını izləmək üçün dünyanın dörd bir yanından turistlər Azərbaycana səfər etdi. Onlar ölkəmizin gözəlliyindən, qonaqpərvərliyindən heyran olduqlarını bəyan etdilər.
Qeyd edək ki, Prezident İlham Əliyev İslamiadanın qalibləri və onların məşqçiləri ilə keçirilən görüşdə İslam Oyunları ilə bağlı ölkəyə turist axını barədə fikir səsləndirib: "IV İslam Həmrəyliyi Oyunlarından sonra ölkəmizə daha çox turist axını olacaq".
Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Rüfət Quliyev "Bakı-Xəbər"ə açıqlamasında qeyd etdi ki, "Bakı-2017" İslam Həmrəyliyi Oyunları yüksək səviyyədə keçirildi: "İslam Həmrəyliyi Oyunlarının möhtəşəm şəkildə keçirildiyini Bakıya gələn qonaqlar dəfələrlə dilə gətirib. Mənimlə görüşən xaricilər də İslamiadanın möhtəşəm şəkildə keçirilməsindən danışıb. IV İslam Həmrəyliyi Oyunlarının böyük əks-sədası sürətlə dünyaya yayılır. Milyonlarla insan Bakıda keçirilən İslam Oyunlarından xəbərdar oldular. Xaricdə yaşayan insanlar bu yarış vasitəsilə Azərbaycanı tanıdılar. Bu kimi faktlar əcnəbi vətəndaşların ölkəmizə maraq göstərməsinə səbəb olur".
R.Quliyev onu da vurğuladı ki, Azərbaycan bu günə kimi bir neçə beynəlxalq əhəmiyyətli idman yarışına ev sahibliyi edib. Tək idman tədbirləri deyil, eyni zamanda, mədəniyyət, elmi konfranslar və bir çox yüksək səviyyəli tədbirlər Azərbaycanda keçirilib: "Keçirilən beynəlxalq əhəmiyyətli tədbirlərə görə ölkəmizə gələn xarici qonaqlar Azərbaycana heyran olduqlarını açış şəkildə bəyan edir. İslam Həmrəyliyi Oyunlarının məhz Azərbaycanda keçirilməsi turistlərin ürəyincə oldu. Qonaqların qarşılanmasından tutmuş, onlara göstərilən xidmət Azərbaycan turizminin inkişafına təsir göstərir. Elə turistlər var idi ki, onlar sırf oyunları izləməyə gəldiklərini demişdi. Lakin sonra ölkəmizlə tanış olandan sonra turist kimi mütəmadi olaraq Azərbaycana gələcəklərini bildirdilər. Turistlərin bir qismi İslam Oyunlarını izləməklə yanaşı, rayonlarımızla da maraqlanıb. Onlar "Google" axtarış saytı vasitəsilə bölgələrimiz haqqında məlumat əldə edib. Turistlərlə görüşən zaman onlar mənə deyib ki, bölgələrimiz haqqında əldə etdikləri məlumat onları valeh edib. Turistlər səfalı regionlarımızı gəzmək istədiklərini açıq şəkildə bildirir".
Millət vəkilinin sözlərinə görə, "Bakı-2017" İslam Həmrəyliyi Oyunlarının keçirilməsi Azərbaycan üçün böyük uğurdur. Bu yarışla Azərbaycan növbəti dəfə tarix yazdı.
R.Quliyev bildirdi ki, Prezident İlham Əliyevin dediyi kimi, İslam Həmrəyliyi Oyunlarından sonra ölkəmizə gələn turistlərin sayı daha da artacaq. Buna səbəb Azərbaycanın turistik zona olmasıdır: "Həmçinin, ölkəmizdə yaşanan stabillik turistlərin rahat şəkildə səfər etməsinə səbəb olur: "Elə ölkələr var ki, onlar nə qədər inkişaf etsə də, yaşanan terror aktları turistlərin sayına təsir edir. Bu kimi hadisələr baş vermədiyindən, turistlər ürək rahatlığı ilə Azərbaycana səfər edir".
Həmsöhbətimiz sonda onu da dilə gətirdi ki, Azərbaycanın hədəfi dünya olimpiadasının ölkəmizdə keçirilməsidir: "Azərbaycan dünya olimpiadasını keçirməyə, demək olar ki, tam hazırdır. Təşkilatçılıq məsələsi ilə bağlı qeyd olundu ki, İslam Həmrəyliyi Oyunları Rioda keçirilən olimpiadadan üstün idi. Bunun özü böyük bir faktdır. Azərbaycan bu sınaq imtahanından uğurla keçdi. Artıq dünya olimpiadasının qonaqlarını qəbul etməyə hazırıq". Günel CƏLİLOVA
