Rəşad Həsənov: "Biletin satışından əldə olunan vəsait kifayət qədər xərcləri kompensasiya edə bilər"
Natiq Cəfərli: "Əsas gəlir turist axınından əldə olunur"
Mayın 12-dən 22-nə kimi Bakı IV İslam Həmrəyliyi Oyunlarına ev sahibliyi edib. İslam Həmrəyliyi Oyunlarını izləmək üçün Bakıya çoxlu sayda turist gəlib. Açıqlanan statistik rəqəmlərə əsasən, bilet satışından 3 milyon manat gəlir əldə olunub. Qeyd edək ki, İslam Həmrəyliyi Oyunlarının biletləri həm onlayn şəkildə, həm də kassada satılıb.
Gənclər və idman naziri Azad Rəhimov IV İslam Həmrəyliyi Oyunlarının yekunlarına həsr olunan mətbuat konfransında çıxışı zamanı deyib ki, ümumilikdə 360 min bilet satılıb və bilet satışından 3 milyon manat gəlir olub.
İslam Həmrəyliyi Oyunlarının bilet satışından 3 milyon manat gəlirin əldə olunmasının necə rəqəm olduğunu öyrənmək məqsəlilə ekspertlərə müraciət etdik.
İqtisadçı Rəşad Həsənov mövzu ilə bağlı "Bakı-Xəbər"ə açıqlamasında bunları dedi: "Biletin satışından əldə olunan vəsait kifayət qədər xərcləri kompensasiya edə bilər. Ümid edirəm ki, bilet satışından əldə olunan gəlir xərcləri ödəyər. Bəllidir ki, bu yarış üçün kifayət qədər vəsait sərf olunub".
İqtisadçı-ekspert Natiq Cəfərli isə hesab edir ki, bilet satışından əldə olunan vəsait gəlir yox, dövriyyədir: "Biletin çapı, təhlükəsizlik məsələləri, işçilərin əməkhaqqına xərclənən vəsaiti hesablasaq, qeyd olunan məbləğ tam ödəyə bilməz. Əməliyyat xərcləri kimi bilet satışından əldə edilən gəlirin məbləği 3 milyon manat vəsait olub".
Həmsöhbətimizin sözlərinə görə, sırf idman yarışından gəlir əldə etmək mümkün deyil: "Qeyd edim ki, son zamanlar bu tipli iriçaplı yarışlardan gəlir əldə etmək mümkünsüzdür. Dünya təcrübəsi də bunu sübut edir. Braziliyada keçirilən Rio Olimpiadası da buna sübutdur. Əsas gəlir turist axınından əldə olunur".
Günel CƏLİLOVA
