Aydın Hüseynov: "İnsanların məşğuliyyəti təmin olunduqca, dövlət büdcəsinin gəlirləri artır"
2017-ci ilin yanvar-aprelində ölkədə 86,4 min yeni, o cümlədən 79,6 min daimi iş yerləri açılıb. Dövlət Statistika Komitəsindən verilən məlumata görə, bu dövrdə yaradılmış iş yerlərinin 87,5 faizi qeyri-dövlət sektorunda açılıb.
Yeni iş yerlərinin 23,1 faizi Bakı şəhərinin, 0,7 faizi Naxçıvan Muxtar Respublikasının, 76,2 faizi regionların, o cümlədən 25,7 faizi Aran, 13,9 faizi Lənkəran, 11,3 faizi Gəncə-Qazax, 5,8 faizi Dağlıq Şirvan, 5,7 faizi Şəki-Zaqatala, 5,6 faizi Abşeron, 4,7 faizi Quba-Xaçmaz, 3,2 faizi Yuxarı Qarabağ, 0,3 faizi isə Kəlbəcər-Laçın iqtisadi rayonlarının payına düşüb.
Daimi iş yerlərinin 5,8 faizi yeni yaradılmış müəssisə və təşkilatlarda, 13,2 faizi mövcud müəssisə və təşkilatlarda, 0,9 faizi fəaliyyətini bərpa etmiş müəssisə və təşkilatlarda, 80,1 faizi isə fərdi sahibkarlıq subyektləri tərəfindən yaradılıb.
Hüquqi şəxslər tərəfindən yaradılmış daimi iş yerlərinin 24,3 faizi ticarət, nəqliyyat vasitələrinin təmiri, 20,0 faizi tikinti, 8,4 faizi emal sənayesi, 6,6 faizi su təchizatı, tullantıların təmizlənməsi və emalı, 6,1 faizi nəqliyyat və anbar təsərrüfatı, 5,9 faizi dövlət idarəetməsi və müdafiə, sosial təminat, 4,9 faizi daşınmaz əmlakla əlaqədar əməliyyatlar, 4,3 faizi turistlərin yerləşdirilməsi və ictimai iaşə, 3,8 faizi inzibati və yardımçı xidmətlərin göstərilməsi, 15,7 faizi isə digər iqtisadi fəaliyyət növləri üzrə açılıb.
Görünən odur ki, ölkədə qeyri-neft sektorunun inkişaf etdirlməsi istiqamətində aparılan islahatlar, görülən işlər öz bəhrəsini verir. Bunun nəticəsidir ki, son 4 ayda 80 mindən çox iş yeri açılıb. Bir məqamı da nəzərə almaq lazımdır ki, bu sektorda yaradılan iş yerləri daimi olur.
Sözügedən məsələ ilə bağlı fikirlərini "Bakı-Xəbər"lə bölüşən millət vəkili Aydın Hüseynovun sözlərinə görə, görülən işlər nəticəsində bu ilin 4 ayında iş yerlərinin sayı daha da artıb: "İş yerlərinin sayının artması onun göstəricisidir ki, artıq ölkədə həyata keçirilən iqtisadi strategiyanın başlıca istiqaməti qeyri-neft sektorunun şaxələndirilmiş inkişafıdır. Qeyri-neft sektorunun şaxələndirilməsinin nəticəsidir ki, həm ümumdaxili məhsulda qeyri-neft sektorunun payı artır, həm də yeni iş yerləri açılır. Sözügedən iş yerləri qeyri-neft sektorunun bir hissəsi olan turizm, kənd təsərrüfatı sahələridir. Eləcə də sənaye, sənaye parkları, sənaye məhəllələri bura daxildir. Hesab edirəm ki, bu kimi görülən işlərin nəticəsində çoxsaylı iş yeri açılıb. Çoxsaylı iş yerinin açılması insanların məşğulluğunun təmin olunması deməkdir. Sevindirici hal ondan ibarətdir ki, açılan iş yerlərinin əksəriyyəti daimidir. İş yerləri artdıqca, insanların məşğuliyyəti təmin olunduqca, dövlət büdcəsinin gəlirləri artır. Dövlət büdcəsinin gəlirlərinin artması, ümumilikdə, ölkə əhalisinin sosial rifah halının yüksəldilməsinə gətirib çıxarır. Sosial tədbirlərin həyata keçirilməsinin tam təmin olunmasına şərait yaradır. Bir daha qeyd edim ki, iş yerlərinin açılması ölkədə aparılan uğurlu iqtisadi siyasətin göstəricisidir".
Vidadi ORDAHALLI
