Vüqar Bayramov: "Bu o deməkdir ki, artıq biz yaxın zamanda valyutadəyişmə məntəqələrinin fəaliyyətini müşahidə edəcəyik"
Yaxın müddətdə valyutadəyişmə məntəqələrinin fəaliyyəti yenidən bərpa ediləcək. Hazırda xarici valyutanın dəyişdirilməsi bank şöbələrində həyata keçirilir. Belə şöbələrin azlığı əsasən ölkəmizə gələn xarici turistlərə valyutanın dəyişdirilməsində çətinliklər yaradır. "Valyuta tənzimi haqqında" Qanuna edilən dəyişikliklərə əsasən, fiziki şəxslər də valyutadəyişmə məntəqələri aça bilər.
Bunun üçün müəyyən məbləğdə girov pul tələb edilir. Valyutadəyişmə məntəqəsi açmaq istəyən şəxsin lisenziyası da olmalıdır. Qanunvericiliyə əsasən, lisenziya ərizəsi Maliyyə Bazarlarına Nəzarət Palatası tərəfindən qəbul edilir və həmin gün qeydiyyata alınır. 3 iş günü müddətində ərizənin qeydiyyat tarixi və nömrəsi haqqında ərizəçiyə arayış verilməlidir. Ərizədə çatışmazlıq aşkar edilsə, ərizəçi həmin çatışmazlıqları məlumatı aldığı vaxtdan ən gec 10 iş günü ərzində aradan qaldırmalıdır. Dəyişikliklərin Nazirlər Kabinetinin normativ-hüquqi aktlarına uyğunlaşdırılması üçün 3 ay vaxt müəyyənləşdirilib.
Yeni qaydaların qəbul edilməsində məqsəd xüsusilə də əcnəbilərin valyuta dəyişdirməsini daha rahat və çevik həyata keçirməkdir. Çünki hazırda xarici valyutanın dəyişdirilməsi müvafiq bank şöbələrində həyata keçirilir və onların sayı azdır. Qanuna edilmiş dəyişikliklə bu çatışmazlıqlar aradan qaldırılacaq.
Ümumilikdə, yeni valyutadəyişmə məntəqələrinin əvvəlkilərdən fərqi nə olacaq? Ümumən ekspertlərin gözləntiləri nədir? Məsələyə münasibət bildirən iqtisadçı-ekspert Vüqar Bayramovun sözlərinə görə, qanuna edilən dəyişikliklərə əsasən, artıq fiziki şəxslər də valyutadəyişmə məntəqəsi sahibi ola bilər: "Bunun üçün, məntəqənin yerləşdiyi yerdən asılı olaraq, girov tələb olunur. Girov passiv vəsait kimi təqdim edilir və bu rüsum kimi qəbul edilməməlidir. Valyutadəyişmə məntəqəsinə sahib olmaq istəyən vətəndaşlar lisenziya almalıdır. Bu zaman vətəndaş ərizə ilə yanaşı, bir sıra digər sənədləri də Maliyyə Bazarlarına Nəzarət Palatasına təqdim etməlidir. Bu isə o deməkdir ki, artıq biz yaxın zamanda valyutadəyişmə məntəqələrinin fəaliyyətini müşahidə edəcəyik. Məntəqə Bakıda fəaliyyət göstərəcəksə, o zaman 50 000 manat və 50 000 dollar girova ehtiyac olacaq. Abşeron rayonunda, Sumqayıt və Gəncə şəhərlərində valyutadəyişmə məntəqələrinə sahib olmaq istəyənlər 25 000 manat və 25 000 dollar ödəməli olacaq. Digər bölgələrdə bu işi həyata keçirmək istəyənlər isə girov formasında 10 000 manat və 10 000 dollar ödəməlidir".
Vidadi ORDAHALLI
