Rəşad Həsənov: "İqtisadi bazarın inkişafı məqsədilə kreditlər üçün banklara təminat məktubu verən şirkətlər yaradılması yaxşı olar"
Kreditlər üçün banklara təminat məktubu verən şirkətlər yaradıla bilər. Bu barədə "Atabank" ASC-nin Risq menecmenti departamentinin direktoru, ARPA-nın ekspertlər qrupunun sədri Elman Sadıqov "Risq" analitik-biznes jurnalındakı məqaləsində qeyd edib. O bildirib ki, Azərbaycanda real sektorun maliyyə resurslarına ehtiyacı var, bank sektoru isə risqlərin yüksək olması, kifayət qədər likvid girovun olmaması, valyuta bazarında qeyri-müəyyənlik və s. səbəblərdən kreditlərin verilməsində maraqlı deyil. Bu iki sektoru ortaq nöqtəyə gətirə biləcək dövlət və özəl şirkətlər təsis edərək müəyyən məqsədlərə nail olmaq mümkündür.
Onun fikrincə, bu şirkətlər müəyyən komissiya haqqı qarşılığında verilən kreditlər üçün banklara kreditləşən müəssisələrin xeyrinə təminat məktubu verə bilər: "Qarşılığında isə kreditin risqi aşağı düşür, faiz dərəcəsi enir, kreditə isə həmin şirkətdə əlavə olaraq yaxından nəzarət edilir. Bu mexanizm üzərində düşünməyə dəyər".
Məsələ ilə bağlı fikir bildirən iqtisadçı-ekspert Rəşad Həsənov "Bakı-Xəbər"ə açıqlamasında qeyd etdi ki, banklar qarşısında birbaşa öhdəliyi təminat verən şirkət öz üzərinə götürəcək. Bu isə o deməkdir ki, növbəti dövrlərdə bankların kredit portfeli etibarlı əsaslarla formalaşdırılacaq: "İstər vətəndaş, istərsə də biznes subyekti ilə kreditgötürənin hər hansı bir hadisə ilə üzləşməsi nəticəsində yaranan risqlər kredit üçün təminat verən təşkilat tərəfindən hansısa formada kompensasiya olunacaq. Bu da növbəti dövrdə kreditləşmənin genişlənməsinə səbəb olacaq. Belə addım bankların kredit portfelinin sağlamlaşdırılmasına müsbət təsir göstərə bilər".
Həmsöhbətimiz hesab edir ki, iqtisadi bazarın inkişafı məqsədilə kreditlər üçün banklara təminat məktubu verən şirkətlər yaradılması yaxşı olar. Ancaq, böyük ehtimalla, təminat verən şirkətlər kredit üçün müraciət edənin maliyyə vəziyyətini dərindən təhlil edəcək və son nəticədə göstəricilər əsasında təminat məktubu veriləcək.
Günel CƏLİLOVA
