Ramil Hüseyn: "2017-ci ildə 100 ton barama istehsal olunacağı gözlənir"
Prezident İlham Əliyev Azərbaycanda ipəkçiliyin maddi-texniki bazasının yaxşılaşdırılması ilə bağlı əlavə tədbirlər haqqında Sərəncam imzalayıb.
Sərəncamda qeyd olunur ki, ölkədə kənd təsərrüfatının ənənəvi sahələrindən olan ipəkçiliyin maddi-texniki bazasının yaxşılaşdırılması, barama istehsalçılarının məhsuldar tut ipəkqurdunun cins və hibrid toxumları ilə təmin edilməsi və bu sahədə seleksiya-damazlıq işlərinin təşkili məqsədilə Qax Damazlıq İpəkçilik Stansiyasının bərpası, əlavə istehsal sahələrinin yaradılması və müasir avadanlıqlarla təchiz olunması üçün Azərbaycan Respublikasının 2017-ci il dövlət büdcəsində nəzərdə tutulmuş Azərbaycan Prezidentinin ehtiyat fondundan Kənd Təsərrüfatı Nazirliyinə 4,5 milyon manat ayrılsın.
Maliyyə Nazirliyinə bu sərəncamda göstərilən məbləğdə maliyyələşməni təmin etmək tapşırılıb.
Nəzərə alsaq ki, Azərbaycanın ipəkçilik sahəsi üzrə tarixən özünəməxsus ənənələri olub, o baxımdan belə bir qərarın verilməsi ümumi işin xeyrinə olacaq.
Sözügedən məsələni dəyərləndirən iqtisadçı-ekspert Ramil Hüseynin fikrincə, bu qərar ipəkçiliyin inkişafına xidmət edəcək: "Son 2 ildə ipəkçiliyin inkişafı ilə bağlı kompleks tədbirlər görülüb. Prezidentin 16 noyabr 2016-cı il tarixli Sərəncamı ilə barama toxumlarının alınmasına 163 min manat, tut tinglərinin alınmasına 600 min manat vəsait ayrılıb. Bu vəsait hesabına tədarük olunan barama toxumları, tut tingləri məhsul istehsalçılarına əvəzi ödənilmədən paylanıb. Nazirlər Kabinetinin qərarına əsasən isə, barama istehsalı ilə məşğul olan şəxslərə barama emalı və ipək istehsalı müəssisələrinin qəbul etdiyi bütün növ yaş baramanın hər kiloqramına görə verilən subsidiyanın məbləği 5 manat müəyyənləşdirilib. Məhz görülən tədbirlər nəticəsində bu sahədə inkişaf başlayıb. Belə ki, 2015-ci ildə Azərbaycanda 200 kiloqram barama tədarük edildiyi halda, 2016-cı ildə bu rəqəm 70 tona çatıb. 2017-ci ildə isə 100 ton barama istehsal olunacağı gözlənir. Digər tərəfdən, bu il Kənd Təsərrüfatı Nazirliyi tərəfindən Çin Xalq Respublikasından 6000 qutu barama toxumu tədarük edilərək, Qax Damazlıq İpəkçilik Stansiyasında inkubasiyaya qoyulub. Daha sonra isə burada barama qurdları əldə edilərək 31 rayonun kümçülərinə əvəzi ödənilmədən paylanıb. Yəni Qax Damazlıq İpəkçilik Stansiyası ölkədə ipəkçiliyin inkişafında mühüm rola malikdir və onun bərpası üçün addımların atılması növbəti illərdə barama toxumu ilə bağlı xaricdən asılılığı azaldacaq. Bu sərəncam "Azərbaycan Respublikasında kənd təsərrüfatı məhsullarının istehsalına və emalına dair Strateji Yol Xəritəsi"ndə 2015-ci il ilə müqayisədə 2020-ci ildə barama istehsalı, eləcə də emalı üzrə istehsal həcminin ən azı 1000 dəfə artması hədəfinə nail olunmasına töhfə verəcək".
Vidadi ORDAHALLI
