Tahir Mirkişili: "1-ci rübdə qeyri-neft sektorunun inkişafında bank kreditlərinin xüsusi çəkisinin artması..."
Natiq Cəfərli: "Hazırda banklar tərəfindən ölkə iqtisadiyyatına yatırılan vəsaitin həcmi elə də yüksək deyil"
İqtisadiyyata investisiyalarda bank kreditlərinin payı artıb. Cari ilin yanvar-aprel ayları ərzində Azərbaycanda bütün maliyyə mənbələrindən əsas kapitala yönəldilən investisiyaların 10,8 faizini və ya 488 mln. manatını bank kreditləri təşkil edib və nəticədə investisiyalarda bank kreditlərinin həcmi illik 37,7 faiz artıb. Bu barədə Dövlət Statistika Komitəsinin yaydığı məlumatda qeyd olunur.
Kreditlərin cəmi vəsaitlərdə xüsusi çəkisində isə illik müqayisədə 3,1 faiz bəndi artım müşahidə olunub.
Hesabat dövründə ölkənin iqtisadi və sosial sahələrinin inkişafı üçün bütün maliyyə mənbələrindən əsas kapitala 4 533,4 mln. manat və ya əvvəlki ilin müvafiq dövrü ilə müqayisədə 3,5 % az vəsait yönəldilib. Əsas kapitala yönəldilmiş cəmi vəsaitin 72,8 %-ni müəssisə və təşkilatların vəsaitləri, 10,3 %-ni büdcə vəsaitləri, 4,4 %-ni əhalinin şəxsi vəsaitləri, 1,2 %-ni büdcədənkənar fondların vəsaitləri təşkil edib. Ümumi sərmayənin 28,1 %-i dövlət, 71,9 %-i qeyri-dövlət sektorunun sərmayədarları tərəfindən qoyulub. Daxili mənbələrdən əsas kapitala yönəldilmiş vəsaitin dəyəri ümumi sərmayənin 36,5 %-ni təşkil edib.
İqtisadiyyata investisiyalarda bank kreditlərinin payının artması barədə fikir bildirən iqtisadçı-ekspert Natiq Cəfərli "Bakı-Xəbər"ə açıqlamasında qeyd etdi ki, hazırda banklar tərəfindən ölkə iqtisadiyyatına yatırılan vəsaitin həcmi elə də yüksək deyil: "Əslində, istehlak və investisiya kreditlərinin yüksək artım qeydə alınmayıb. Sadəcə, iri layihələr var ki, onlar tərəfindən investisiya qoyuluşunda bank kreditlərinin payı artıb. Nəzərə almaq lazımdır ki, SOCAR tərəfindən həyata keçirilən layihələrin həcmi yüksəkdir. Həmçinin, investisiyaların böyük bir qismi Azərbaycanın iştirak etdiyi iri layihələrin tikintisi ilə bağlı beynəlxalq maliyyə institutlarından cəlb olunan vəsaitlər şəklində yatırılıb".
Həmsöhbətimizin sözlərinə görə, bankların normal fəaliyyət göstərməsi üçün onların problemli kredit məsələsi həll olunmalıdır. Bankların dövriyyəsi və kredit portfeli artırılsa, investisiya qoyuluşu üçün cəlbedici olar: "Problemli kredit məsələsi həll edilərsə və bankların sağlamlaşdırılması prosesi bitdikdən sonra, 2017-ci ilin sonuna doğru maliyyə sektoruna qoyulan investisiyalarda irəliləyiş müşahidə oluna bilər".
Məsələ ilə bağlı millət vəkili Tahir Mirkişilinin də mövqeyini öyrəndik. O, "Bakı-Xəbər"ə açıqlamasında bunları qeyd etdi: "2017-ci ilin 1-ci rübünün iqtisadi nəticələri kənd təsərrüfatı və qeyri-neft sektorunda artımla yekunlaşdı. Eyni zamanda, bu dövrdə ixracın də həcmi artıb. İqtisadi artımı təmin edən əsas mənbələrdən biri də iqtisadiyyata qoyulan investisiyalar və onların istiqamətləridir. İqtisadi təhlillərə görə, kreditlərin xüsusi çəkisinin yüksək olması iqtisadi artımı şərtləndirir. Bu baxımdan, məntiqi olaraq, 1-ci rübdə qeyri-neft sektorunun inkişafında bank kreditlərinin xüsusi çəkisinin artması qanunauyğun bir prosesdir və bu, iqtisadi aktivliyin də artmasına səbəb olacaq".
Günel CƏLİLOVA
