İldırım Qurbanov: "Bu da, öz növbəsində, qeyri-neft ixracının artmasına müsbət təsirini göstərir"
Prezident İlham Əliyev Niderland Krallığı Senatının sabiq sədri, Azərbaycanın Niderlandlı Dostları Qrupunun rəhbəri Rene Van der Lindeni qəbul edib. Azərbaycan-Niderland əlaqələrinin genişləndirilməsi üçün qarşılıqlı marağın olduğunu bildirən dövlət başçısı ölkələrimiz arasında müxtəlif səviyyəli səfərlərin önəmini qeyd edib.
İlham Əliyev Azərbaycanın ixracat potensialının genişləndiyini vurğulayaraq, son 4 ayda ölkəmizin qeyri-neft ixracının 22 faiz artdığını deyib. Söhbət zamanı təhsil, turizm, kənd təsərrüfatı və digər sahələrdə əməkdaşlıq əlaqələrinin genişləndirilməsi ətrafında fikir mübadiləsi aparılıb.
Ümumilikdə, iqtisadiyyatda qeyri-neft sektorunun payının 50 faizdən çox olması və bu nisbətin getdikcə daha çox böyüməsi ümumdaxili məhsul istehsalının neftdən kənar sahələrdən asılılığını artırmaqdadır. Azərbaycanda aktiv neft hasilatına və ixracına başlandığı 2006-cı ilə qədər iqtisadiyyatda qeyri-neft sektoru 50 faizdən artıq paya sahib idi. 2000-ci ildə iqtisadiyyatın 64,7 faizi, 2005-ci ildə 48,4 faizi qeyri-neft sektorunda yaradılmışdı. 2005-ci ildə məhsula və idxala xalis vergiləri də nəzərə alsaq, ÜDM istehsalının 50 faizdən çoxu qeyri-neft sektorunda formalaşıb. Ancaq 2006-cı ildən 2012-ci ilə qədər iqtisadiyyatda əsas paya neft sektoru sahib olub. 2012-ci ildən vəziyyət yenidən qeyri-neft sektorunun xeyrinə dəyişib və həmin ildə ÜDM istehsalının 50 faizdən çoxu burada formalaşdırılıb. 2015-ci ildə bu nisbət 65 faizə, 2016-cı ildə 67 faizə yüksəlib. Görünən odur ki, qeyri-neft sektoru inkişaf etdikcə, bu sahədə ixrac da artır. Ümumən bunu ekspertlər necə dəyərləndirir? Məsələyə münasibət bildirən iqtisadçı-ekspert İldırım Qurbanovun sözlərinə görə, bütövlükdə, bu müsbət tendensiyadır: "Dünya bazarında neftin qiymətinin kəskin düşməsi fonunda Azərbaycanda qeyri-neft sektorunun inkişafı üçün bir sıra tədbirlər görülüb. Ötən ilin doqquz ayında qeyri-neft sektorunun ümumdaxili məhsulda payı ötən ilin müvafiq dövrü ilə müqayisədə bir qədər azalsa da, sənayenin qeyri-neft sahələrində 3,6 faizlik artım qeydə alınıb. Prezident İlham Əliyev tərəfindən 2014-cü ilin "Sənaye ili" elan edilməsi və bununla bağlı təsdiq edilmiş tədbirlər planının icrası qeyri-neft sənayesinin inkişafına yeni impuls verib. Bütövlükdə isə, "Sənaye ili" çərçivəsində və sonrakı dövrdə həyata keçirilmiş tədbirlər müsbət nəticələr verir. Bu da, öz növbəsində, qeyri-neft ixracının artmasına müsbət təsirini göstərir. Ölkə iqtisadiyyatının şaxələndirilməsi istiqamətində həyata keçirilən ardıcıl və məqsədyönlü tədbirlər qeyri-neft sənayesinin sürətli inkişafına səbəb olub. Bütün bunlar, heç şübhəsiz, ölkədə son illərdə sənayeləşmə, yeni sənaye zonalarının yaradılması ilə bağlı görülmüş işlərin, məqsədyönlü tədbirlərin nəticəsidir. Ölkə başçısının tapşırığı ilə 2004-cü ildən həyata keçirilən Regionların sosial-iqtisadi inkişafına dair Dövlət Proqramının uğurla icrası Azərbaycanda müasir infrastruktur formalaşdırıb, özəl sektorun inkişafı üçün optimal şərait yaradıb". Vidadi ORDAHALLI
