Vüqar Bayramov: "...qonşu ölkələrdə yaşayan azərbaycanlılar vəsaitlərini bank yolu ilə deyil..."
2017-ci ilin yanvar-mart aylarında Azərbaycana pul köçürmələri azalıb. Məlumata əsasən, 2017-ci ilin yanvar-mart aylarında Azərbaycana pul köçürmələrinin həcmi 140,5 mln. dollar təşkil edib ki, bu da ötən ilin müvafiq dövrünün göstəricisindən 21,6 faiz azdır.
Qeyd olunur ki, tərəfdaş ölkələrdə iqtisadi vəziyyət respublikaya pul köçürmələrinin həcminə təsir edib. İlkin qiymətləndirmələrə görə, 2017-ci ilin yanvar-mart aylarında onların həcmi 2016-cı ilin müvafiq dövründə qeydə alınmış 179,2 mln dollara qarşı 140,5 mln dollar təşkil edib. 2016-cı ildə Azərbaycana pul köçürmələrinin həcmi 564,1 mln. dollar, 2015-ci ildə isə 1 mlrd. 183 mln dollar təşkil edib.
Azərbaycana pul köçürmələrinin azalması nə ilə bağlıdır? Məsələ ilə bağlı iqtisadçı-ekspert Vüqar Bayramova müraciət etdik. O, "Bakı-Xəbər"ə açıqlamasında qeyd etdi ki, pul köçürmələrinin azalmasının ilkin səbəbi Rusiyadan Azərbaycana köçürülən vəsaitlərin həcminin azalmasıdır: "Bəlli olduğu kimi, Rusiyada yaşanan iqtisadi çətinlik pul köçürmələrə də öz mənfi təsirini göstərib. Həmçinin, Rusiyada yaşayan və işləyən azərbaycanlıların ölkəmizə göndərdikləri vəsaitin həcmində də azalmalar var. Nəticə etibarilə ölkəyə göndərilən pul köçürmələrinin həcmində azalma qeydə alınır".
Həmsöhbətimizin sözlərinə görə, pul köçürmələri ilə bağlı son zamanlar banklar tərəfindən müəyyən sərtləşdirici addımlar atılıb: "Bəzi bankların fəaliyyətində yaranan çətinliklər səbəbindən qonşu ölkələrdə yaşayan azərbaycanlılar vəsaitlərini bank yolu ilə deyil, nağd şəkildə göndərməyə üstünlük verir. Belə olan halda, bank xidmətlərindən istifadə də azalır. Bütün hallarda, pul köçürmələrinin azalmasının əsas səbəbi ölkəyə daxil olan
remitens məbləğinin azalmasıdır. Remitens məbləğinin azalması pul köçürmələrinin həcminin əvvəlki dövrlərə nisbətən azalmasına səbəb olur".
Günel CƏLİLOVA
