Nüsrət İbrahimov: "Orta və aşağı ödəmə qabiliyyətinə malik olan turist ailələr daha çox kirayə mənzildə yaşayıb istirahət etməyə üstünlük verir"
Son illər ölkəmizə gələn turistlərin sayı artır. Ölkəmizdə keçirilən beynəlxalq əhəmiyyətli yarışlar, sosial-iqtisadi inkişaf turistlərin diqqətini çəkir. Hazırda IV İslam Həmrəyliyi Oyunları keçirilir. Yarışı izləmək məqsədilə müxtəlif ölkələrdən çoxlu sayda turist paytaxt Bakıya gəlib. Turistlərin sayının çox olması sevindiricidir.
Ölkəmizə gələn əcnəbilər otellərdə yaşamaqla yanaşı, Bakıda kirayə evlər də tuturlar. Məlumatlara görə, Azərbaycanda şəxsi evlərin turistlərə kirayə verilməsi halları artıb.
Azərbaycan Turizm Assosiasiyası (AzTA) sədrinin müşaviri Müzəffər Ağakərimov media nümayəndələrinə açıqlamasında bildirib ki, belə hallar həm Bakının mərkəzində, həm də paytaxtdan kənar ərazilərdə müşahidə edilir.
Azərbaycanda otellərin sayının az olduğunu deyən M.Ağakərimov qeyd edib ki, ölkədə yeni otellərin inşası vacibdir. AzTA rəsmisi qeyd edib ki, otellərin inşası üçün stimullaşdırıcı tədbirlər həyata keçirilməlidir: "Azərbaycana gələn turistlərin sayı getdikcə artır. Ona görə də otellərə tələbat var".
Mövzu barədə fikir bildirən daşınmaz əmlak məsələləri üzrə ekspert Nüsrət İbrahimov "Bakı-Xəbər"ə açıqlamasında qeyd etdi ki, orta və aşağı ödəmə qabiliyyətinə malik olan turist ailələr daha çox kirayə mənzildə yaşayıb istirahət etməyə üstünlük verir: "Bu təbəqəyə aid olan əcnəbilər otellərdə bahalı otaq götürməkdənsə, ucuz qiymətə olan mənzildə yaşamağa razılıq verir. Xüsusən də İran və ərəb ölkələrindən gələn turistlər kirayə mənzildə yaşamağa maraq göstərir. Onu da qeyd edim ki, əsasən 2-3 turist ailəsi bir evdə kirayə yaşayır".
Həmsöhbətimizin sözlərinə görə, turistlər əsasən şəhərin mərkəzində olan evləri kirayə tutur.
Ekspertin fikrincə, turistlər tərəfindən tutulan kirayə mənzildə onların yaşama müddəti qısa çəkir: "Çünki onlar bayram və ya hansısa tədbiri izləmək üçün gəlir və mənzildə rahat yaşayışa üstünlük verirlər. Bəllidir ki, bayram və ya tədbirlərin keçirilmə müddəti uzun olmur. Hazırda ölkəmizdə İslam Həmrəyliyi Oyunları keçirilir. Yarışı izləmək üçün ölkəmizə çoxlu sayda turist gəlib. Həmin turistlərin bir qismi oteldə qalır, bir qismi isə kirayə mənzillərdə".
Günel CƏLİLOVA
