Zakir Əhmədov: "Əmlakı hərraca çıxarmaqla məsələ bitmir"
Xəbər verildiyi kimi, Azərbaycanda ləğvetmə prosesində olan banklardan ilk olaraq "Royal Bank" və "Atrabank" ASC-lərin əmlakı hərraca çıxarılacaq. Bunu mətbuata açıqlamasında Əmanətlərin Sığortalanması Fondunun icraçı direktoru Azad Cavadov bildirib. Onun sözlərinə görə, yaxın zamanlarda bununla bağlı müqavilə imzalanacaq: "Artıq Hərrac Mərkəzi ilə danışıqlar aparılıb. Fondun Himayəçilik Şurası tərəfindən əmlakların hərraca və satışa çıxarılması qaydaları hazırlanıb və təsdiqlənib.
Yaxın zamanlarda Hərrac Mərkəzi ilə müqavilə imzalanacaq. "Atrabank"ın bütün əmlakı satışa çıxarılacaq. Əmlaklar satıldıqca, kreditorların tələbləri daha sürətlə yerinə yetiriləcək. "Atrabank"ın əmlakının bazar dəyəri 14 milyon manat dəyərində qiymətləndirilir. Əmlakların balans dəyəri isə 37 milyon manat təşkil edir".
Maraqlıdır, sözügedən bankların əmlakı satıldıqdan sonra həmin bankların əmanətçilərə olan borcunu tam qaytarmaq mümkün olacaqmı? Məsələ ondadır ki, Azərbaycanda bir sıra banklar bağlanandan sonra ciddi problemlər ortaya çıxdı. Xüsusən də sığortalanmayan əmanətlərin qaytarılması məsələsində bu özünü daha qabarıq formada göstərməyə başladı. O baxımdan ekspertlərin gözləntiləri nədən ibarətdir?
Məsələyə münasibət bildirən ekspert Zakir Əhmədovun sözlərinə görə, əmlak satılandan sonra bütün borcların tam qaytarılması real görünmür. O bunu bir sıra arqumentlərlə əsaslandırdı: "Məsələ ondadır ki, sığorta olunan əmanətlərlə bağlı problem yaşanmır. Əmanətlərin Sığortalanması Fondu lisenziyası ləğv olunan bankların qorunan əmanətləri ilə bağlı kompensasiya ödəyir. Bununla əlaqədar lazımi informasiyaları da verir. Məsələn, "Atrabank" ASC-nin qorunan əmanətləri ilə bağlı 14 mln. 271 min manat (ümumi kompensasiya öhdəliyinin 98,1 %-dən artıq) kompensasiya ödənişi həyata keçirilib. "Royal Bank"da da qorunan əmanəti olanlara kompensasiya ödənişi başa çatıb. Əmanətlərin Sığortalanması Fondu bankın əmanətçilərinə toplam təxminən 17 mln. manat ödəyib. Ancaq məsələ ondadır ki, bununla problem həll olunmur. 2012-ci ilin ortalarında "Royal Bank"ın lisenziyası ləğv olunandan sonra əmanətçilərə 41 milyon manat borcu yaranmışdı. Bunun 17 milyonunu ƏSF ödəyibsə, yerdə qalır 34 milyon manat. Hazırkı iqtisadi şəraitdə hərraca çıxarılan əmlak alınarsa və bunun üçün tələb olunan ödəniş edilərsə, o zaman müştərilərin borcu qaytarılacaq. Yox, hərraca çıxarılan əmlaka müştəri tapılmazsa, yəni satış qiyməti alıcını qane etməsə, o zaman çətin olacaq. Əmlakı hərraca çıxarmaqla məsələ bitmir. Əsas odur ki, onu təklif olunan qiymətə alan olsun. Buna da ümumi iqtisadi vəziyyət öz təsirini göstərir. O baxımdan hesab edirəm ki, əmlakı hərraca çıxarılan banklar əmanətçilərə olan borcunun bir qismini qaytara bilər". Vidadi ORDAHALLI
