Pərviz Heydərov: "Ölkədə pərakəndə ticarət dövriyyəsi həcminin cari ilin yanvar-aprel ayları ərzində artması əhalinin daha çox məhsul aldığı, yəni alış-verişin çoxaldığı anlamına gəlmir"
2017-ci ilin yanvar-aprel aylarında pərakəndə ticarət şəbəkəsində satılmış məhsulların dəyəri əvvəlki ilin eyni dövrünün səviyyəsini müqayisəli qiymətlərlə 1,7 faiz üstələyərək 10,2 milyard manata bərabər olub.
Dövlət Statistika Komitəsinin məlumatına əsasən, ticarət dövriyyəsinin 50,6 faizini ərzaq məhsulları, içkilər və tütün məmulatları, 49,4 faizini qeyri-ərzaq məhsulları təşkil edib və satılmış məhsulların dəyəri 2016-cı ilin yanvar-aprel aylarının göstəricilərini real ifadədə müvafiq olaraq 0,6 faiz və 2,7 faiz üstələyib.
Mövzu ilə bağlı fikir bildirən İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, ölkədə pərakəndə ticarət dövriyyəsi həcminin cari ilin yanvar-aprel ayları ərzində artması əhalinin daha çox məhsul aldığı, yəni alış-verişin çoxaldığı anlamına gəlmir: "Əlbəttə, birillik müqayisədə ticarət həcminin genişlənməsi, əslində, mümkündür və realdır. Ancaq iş ondadır ki, yaranmış məlum iqtisadi vəziyyətlə əlaqədar əhalinin alıcılıq qabiliyyəti zəifləyib. Yəni artıq 2015-ci və 2016-cı il də daxil olmaqla, iki ildən çoxdur ümumi alış-veriş səviyyəsi enib. Buna həm qeyd etdiyim kimi, əhalinin alıcılıq qabiliyyətinin zəifləməsi, həm də istehlak qiymətlərinin səviyyəsinin yüksəlməsi təsir göstərib. Bax elə məhz sonuncu amil pərakəndə ticarət dövriyyəsinin həcminin yüksəldiyinin əsas göstəricisidir. Başqa sözlə desəm, qiymətlər bahalaşıb deyə, ticarətin artdığı qeydə alınıb. Faktiki olaraqsa, ticarət azalıb. Bunu statistika da deyir. 2017-ci ilin yanvar-aprel aylarında pərakəndə ticarət şəbəkəsində satılan məhsulların dəyəri əvvəlki ilin eyni dövrü səviyyəsi ilə müqayisədə, yəni qiymətlərlə 1,7 faiz artaraq 10,2 milyard manata bərabər olub. Nəzərə almalıyıq ki, ticarət dövriyyəsinin 50,6 faizini ərzaq məhsulları təşkil edib. Yeri gəlmişkən qeyd edim ki, keçən il ölkədə 12,4 faiz inflyasiya qeydə alınıb. Ən çox bahalaşan ərzaq məhsulları olub".
Günel CƏLİLOVA
