Natiq Cəfərli: "Banklar regionlarda yerləşən daşınar və ya daşınmaz əmlakı girov kimi götürmək istəmir"
Açıqlanan statistik rəqəmlərə əsasən, Azərbaycanda regionların kreditləşməsi azalıb. Azərbaycanda 2017-ci il aprelin 1-nə ölkə iqtisadiyyatına kredit qoyuluşunun 85,3 %-i Bakı şəhərinin payına düşüb və kreditlər üzrə orta faiz dərəcəsi illik 9,1 % təşkil edib.
Azərbaycan Mərkəzi Bankının aylıq hesabatına əsasən, regionların kreditləşməsi ölkə üzrə cəmi kreditlərin 14,7 %-ni əhatə edib və faiz dərəcəsi 9-22,2 % arasında dəyişir. Ölkə üzrə isə kreditlərin orta faiz dərəcəsi aprelin 1-nə 10,6 % olub.
Beləliklə, regionların kreditləşməsi illik müqayisədə azalıb. Belə ki, ötən ilin müvafiq dövründə kreditlərin 84,2 %-i Bakı şəhəri, 15,8 %-i regionların payına düşüb.
Regionların kreditləşməsinin azalması barədə fikir bildirən iqtisadçı-ekspert Natiq Cəfərli "Bakı-Xəbər"ə açıqlamasında qeyd etdi ki, risq menecmentinin zəifləməsi bankların kredit verilişini zəiflədib: "Artıq banklar anlayır ki, verdikləri krediti toplaya bilmir. Geri qayıtmayan kreditlərin həcmi günü-gündən artır. Regionlarda işlə bağlı problemlərin olması bu sahəyə öz təsirini göstərir".
Həmsöhbətimizin sözlərinə görə, regionlarda iqtisadi aktivlik azalıb. İqtisadi aktivliyin azalması kreditləşməyə təsir göstərir.
N.Cəfərli onu da əlavə etdi ki, banklar zəmanət olaraq regionlarda yerləşən daşınar və ya daşınmaz əmlakı girov kimi götürmək istəmir: "Çünki onların qiymətində azalmalar müşahidə olunur".
İqtisadçının sözlərinə görə, iqtisadi aktivliyin zəif olması və yüksək kredit faizləri əhalinin kredit götürmək istəyini azaldır: "Kommersiya 25 faiz, istehlak krediti isə daha yüksəkdir. Bu cür rəqəm, təbii ki, insanlarda kredit götürmək istəyini azaldır. Kreditləşmənin azalması dolayısı ilə iqtisadi aktivliyin azalmasına təsir göstərir".
Günel CƏLİLOVA
