Günel Fərhadqızı: "Bu reallaşarsa, gələcəkdə Azərbaycan dövlət qurumları tərəfindən verilmiş keyfiyyət sertifikatı dünya tərəfindən də qəbul edilə bilər"
BMT-nin Ərzaq və Kənd Təsərrüfatı Təşkilatı (FAO) Azərbaycanın Qida Təhlükəsizliyi Agentliyinin formalaşdırılmasına və fəaliyyətinə kömək etməyə hazırdır.
Bunu FAO-nun baş direktorunun müavini, təşkilatın Avropa və Mərkəzi Asiya üzrə regional nümayəndəsi Vladimir Raxmanin deyib. O qeyd edib: "Şadam ki, Azərbaycan hökuməti Prezidentin fərmanı əsasında Qida Təhlükəsizliyi Agentliyinin yaradılması barədə qərar qəbul edib".
V.Raxmanin bildirib ki, bu mühüm və müsbət qərardır: "Qida məhsullarının təhlükəsizliyi üzrə səmərəli sistemin təmin olunması üçün ölkə hökumətinin qərarı FAO-nun əsas tapşırıqlarına cavab verir".
Baş direktorun müavini əlavə edib ki, belə agentliyin yaradılması Azərbaycanda ərzaq məhsullarının təhlükəsizliyi standartlarını yüksəltməyə imkan verəcək və ölkənin ixrac potensialını artıracaq.
Yaradılmasını nüfuzlu beynəlxalq qurumun da alqışladığı bu qurumun fəaliyyəti Azərbaycan iqtisadiyyatına nə verə bilər?
Ekspert Günel Fərhadqızının sözlərinə görə, Qida Təhlükəsizliyi Agentliyinin yaradılması ilə ölkənin qida sektorunda yaşanan problemlər tədricən aradan qaldırılacaq: "Agentliyin yaradılmasında məqsəd bu istiqamətdə mövcud nəzarətin, eyni zamanda, problemlərin həlli istiqamətində görüləcək işlərin vahid idarəetmə altında birləşdirilməsidir.
Qida Təhlükəsizliyi Agentliyinin işi düzgün qurularsa, hazırda prioritet sahə hesab olunan kənd təsərrüfatının inkişafına da müsbət təsir göstərə bilər. Ancaq ümumilikdə, kənd təsərrüfatı müqayisəli üstünlüyə malik sahələrdən biri hesab olunur və ixracda müəyyən paya malikdir. Bəllidir ki, sahibkarlar bu istiqamətdə müəyyən problemlərlə üzləşir. Xüsusilə də dünya bazarının tələblərinə uyğun keyfiyyətli məhsul istehsal edilməsi, sertifikatların alınması, keyfiyyət standartlarının əldə olunması və ixrac əlaqələrinin qurulması məsələlərində problemlərlə üzləşirlər. Yeni yaradılan qurumun vəzifələrindən biri də Azərbaycanda standartların beynəlxalq standartlara uyğunlaşdırılmasını təmin etməkdir. Bu reallaşarsa, gələcəkdə Azərbaycan dövlət qurumları tərəfindən verilmiş keyfiyyət sertifikatı dünya tərəfindən də qəbul edilə bilər. Dövlət bununla bağlı işlər aparmalıdır. Bu, Azərbaycanla əməkdaşlıq edən ölkələrə də məlumdur. Məlum olmasa belə, ilkin olaraq hər hansı müayinələrdə üzə çıxır ki, bu məhsullar əslində sertifikatda göstərilən tələblərə cavab vermir. Bu da son nəticədə ölkənin ixracına mənfi təsir göstərir. Bu qurum ilk növbədə reputasiyasının müsbətə doğru dəyişməsinə çalışmalıdır. Təbii ki, belə bir qurumun fəaliyyəti bizimlə tərəfdaş olmaq istəyən bütün dairələri sevindirir".
Məhəmmədəli QƏRİBLİ
