Natiq Cəfərli: "Əsas hədəfimiz qeyri-neft sektoru və daxili istehsalın inkişafı, ixracat potensialının artmasıdır, bütün bunlar real olarsa, inflyasiyanın səviyyəsi aşağı düşər"
"Yaxın 3 il ərzində Azərbaycanda inflyasiya əhəmiyyətli dərəcədə azalacaq". Bu, Dünya Bankının Avropa və Mərkəzi Asiya ölkələri üzrə baş iqtisadçısı Hans Timmerin açıqladığı "Trade in Transition" regional hesabatından məlum olub.
Hesabata əsasən, 2017-ci ildə ölkədə inflyasiyanın həcmi 7,8, 2018-ci ildə 4,2, 2019-cu ildə isə 3,8 faiz təşkil edəcək.
Qeyd edək ki, Dövlət Statistika Komitəsinin məlumatına əsasən, 2016-cı ildə Azərbaycanda inflyasiya 12,4 faiz təşkil edib.
"Trade in Transition"un regional hesabatı barədə fikir bildirən iqtisadçı-ekspert Natiq Cəfərli "Bakı-Xəbər"ə açıqlamasında qeyd etdi ki, son iki ildə Azərbaycanda inflyasiya sürətlə getdi, qiymət bahalaşması yaşandı: "Bu dövrlə müqayisədə, bəli, inflyasiyanın azalması gözləniləndir. Neftin qiyməti yaxın üç il ərzində yüksələcək, ölkənin gəlirləri artacaq və qeyri-neft sektorunda çoxşaxəli modelə keçiləcəksə, inflyasiya azalacaq. Doğrudan da qarşıya qoyulan məqsədlərə nail olunarsa, Dünya Bankının Avropa və Mərkəzi Asiya ölkələri üzrə baş iqtisadçısının tərtib etdiyi hesabat real olar".
Həmsöhbətimizin sözlərinə görə, qarşıya qoyulan məqsədə çatmaq üçün hökumətin hazırladığı plan var. Dünya Bankı da həmin planı nəzərdən keçirərək və onun yerinə yetirilməsi üzrə tədbirlərə əsaslanaraq belə bir rəyi qeyd edib: "Bəllidir ki, son iki il ərzində ölkədə sürətli inflyasiya yaşandı. Ancaq bütün bu çətinliklər geridə qaldı. Yaxın illər ərzində hökumətin tərtib etdiyi plan əsasında qarşıya qoyulan məqsədlərə nail olunacaq. Əsas hədəfimiz qeyri-neft sektoru və daxili istehsalın inkişafı, ixracat potensialının artmasıdır. Bütün bunlar real olmalıdır ki, qiymətlərə pozitiv təsir etsin və inflyasiyanın səviyyəsi aşağı düşsün".
Günel CƏLİLOVA
