Mustafa Abbasbəyli: "İşsizlərin bu durumdan sui-istifadə etməməsi üçün müəyyən şərtlər olmalıdır"
"İşsizlikdən sığorta haqqında" yeni qanun layihəsi Milli Məclisin Əmək və sosial siyasət komitəsinin iclasında müzakirəyə çıxarılıb. Yeni layihə barədə məlumat verən komitə sədri Hadı Rəcəbli bildirib ki, sənəd iki il ərzində Prezident Administrasiyası və müvafiq dövlət orqanları ilə birlikdə hazırlanıb.
O qeyd edib ki, Prezident İlham Əliyev çıxışında dəfələrlə işsizliyin qarşısının alınması və ixtisarların olmaması üçün göstəriş verib: "İşsiz insanlar maliyyə cəhətdən heç vaxt problem yaşamamalıdır. Lakin işsizlərə müavinət verilməsi o demək deyil ki, onlarda ələbaxımlıq yaransın. Təbii ki, işsizlərə müavinətlər müddətli şəkildə veriləcək. Bu məsələ mütəmadi şəkildə nəzarətdə olacaq. Çalışılacaq ki, daha çox iş stajı olanlara daha çox müavinət verilsin".
Onun sözlərinə görə, bu günə qədər bəzi müəssisə rəhbərləri gəlir olmadığı təqdirdə işçilərinin əksəriyyətini ixtisar edirdi: "Yeni qanun layihəsi ilə bunu aradan qaldırmış olacağıq".
Komitə sədri əlavə edib ki, işsizlərə müavinətlərin verilməsi üçün sığorta fondu yaradılacaq: "Fonda toplanan vəsaitin məbləği zamanla artırılacaq. Fonda yığılan vəsaitdən özünüməşğulluq xidməti üçün də istifadə ediləcək. Gələcəkdə fondun imkanları daha da genişləndiriləcək".
İşsizlərə müavinətin verilməsi üçün sığorta fondunun yaradılmasına münasibət bildirən sığorta sahəsi üzrə ekspert Mustafa Abbasbəyli "Bakı-Xəbər"ə açıqlamasında qeyd etdi ki, belə bir fondun təşkili sosial siyasətin bir hissəsidir: "İşsizlərə müavinətlərin verilməsi üçün sığorta fondu Əmək və Əhalinin Sosial Müdafiəsi Nazirliyinin nəzdində ola bilər".
Həmsöhbətimizin bildirdiyinə görə, sığorta fondunun yaradılmasının bir sıra müsbət tərəfləri var: "Belə bir sığorta fondunun olması işsizləri çətin durumda qoymayacaq. Onlara müəyyən məbləğdə müavinət veriləcək. İşsizlərin bu durumdan sui-istifadə etməməsi üçün müəyyən şərtlər də olmalıdır".
M.Abbasbəyli onu da dilə gətirdi ki, bir çox xarici ölkədə də işsizlər üçün sığorta fondu yaradılıb. Həmin fondlar hər işləməyən şəxsə müavinət vermir: "Onların müəyyən şərtləri var. İşləməyən şəxsə o şərtlər əsasında müavinət verilir. Həmin müavinət müddətsiz verilmir. İşsiz qalan işlə təmin olunduqdan sonra müavinətin verilməsi dayandırılır".
Günel CƏLİLOVA
