Aydın Hüseynov: "Ərəb ölkələrinin Azərbaycanda istehsal olunan kənd təsərrüfatı məhsullarına böyük tələbatı var"
İslam Əməkdaşlıq Təşkilatının rəsmi mətbuat orqanı olan "OIC Journal"da Azərbaycan Prezidenti İlham Əliyevin "İslam həmrəyliyinin gücləndirilməsi zamanın çağırışıdır" sərlövhəli məqaləsi dərc edilib. Məqalədə bir sıra məqamlara toxunulub.
Yazıda qeyd olunub ki, qədim tarixə, zəngin mədəni irsə, böyük təbii və insan resurslarına malik İslam aləmi müasir dünya nizamının, beynəlxalq münasibətlər sisteminin yaranması və inkişafında əhəmiyyətli rol oynayıb: "İslam dini həmişə sülh, tolerantlıq, humanizm ideyalarını təlqin etmiş və dünya sivilizasiyasına sanballı töhfələr vermişdir. Müsəlman dünyasının mühüm tərkib hissəsi olan Azərbaycan islam mədəni irsinin yaranması və qorunub saxlanmasında önəmli məkanlardan biri kimi tanınır".
Bununla yanaşı, ölkə başçısı məqalədə vurğulayıb ki, müstəqillik dövründə İslam aləmi ilə münasibətlərin qurulması və inkişaf etdirilməsi Azərbaycanın xarici siyasətinin prioritet istiqamətlərindən birini təşkil edib: "Azərbaycanın ilk diplomatik missiyaları məhz müsəlman ölkələrində fəaliyyətə başlamış, dövlətimiz qısa zamanda İslam Əməkdaşlıq Təşkilatı (İƏT), ISESCO kimi müsəlman dünyasını birləşdirən qurumların fəal üzvünə çevrilmişdir. Azərbaycan islam həmrəyliyinin möhkəmlənməsinə töhfə verən İƏT Gənclər Forumu, İƏT Əmək Mərkəzi, İƏT-ə Üzv Dövlətlərin Jurnalistləri Assosiasiyası kimi yeni qurumların yaradılmasının təşəbbüskarı olmuşdur. Qarşıdakı dövrdə İslam ölkələri ilə iqtisadi sahədə əməkdaşlığın siyasi əlaqələrimizin səviyyəsinə çatdırılması bizim əsas hədəflərimizdən biridir".
Ümumilikdə, son illər İslam ölkələri ilə iqtisadi sahədə əlaqələrin, əməkdaşlığın inkişafı istiqamətində xeyli işlər görülüb. Ancaq bunun daha da inkişaf etdirilməsinə zərurət var. Bu əməkdaşlığın daha da inkişaf etdirilməsi və siyasi əlaqələrin səviyyəsinə çatdırılması vacibdir. Ekspertlər buna necə baxır? Məsələyə münasibət bildirən millət vəkili Aydın Hüseynovun sözlərinə görə, cənab Prezidentin iqtisadi strategiyasının başlıca istiqamətləri rəqabət qabiliyyətli, ixracyönümlü məhsul istehsalıdır: "Eyni zamanda, bu məhsulun dünya bazarına çıxarılmasıdır. Valyuta ehtiyatlarının artırılması baxımından bu çox vacib məsələdir. Bir məqamı nəzərə almaq lazımdır ki, son dövrlər körfəz ölkələri ilə sıx əlaqələrimiz var. Səudiyyə Ərəbistanı, Birləşmiş Ərəb Əmirliyi və digər ərəb ölkələrini göstərmək olar. Ümumən İslam ölkələri ilə siyasi əlaqələrimiz çox yüksək səviyyədə inkişaf edib. Bu əlaqələrin iqtisadi müstəvidə də yüksək səviyyədə qurulmasına ehtiyac var. Bu istiqamətdə də addımlar atılır. Ərəb ölkələrinin Azərbaycanda istehsal olunan kənd təsərrüfatı məhsullarına böyük tələbatı var. İnanıram ki, yaxın gələcəkdə kənd təsərrüfatı, eləcə də sənaye məhsullarının ixracı sahəsində yeni işlərə start veriləcək. Yəni bu məhsullar körfəz ölkələrinə ixrac olunacaq".
Vidadi ORDAHALLI
