Nüsrət İbrahimov: "Başlıca problem mənzil mülkiyyətçilərinin bu sahədə həvəssiz olmasıdır"
İqtisadiyyat Nazirliyi tərəfindən ölkənin mənzil-kommunal təsərrüfatı sahəsində yeni münasibətlərin təbliği, eləcə də çoxmənzilli binalarda bazar iqtisadiyyatı prinsiplərinə əsaslanan yeni idarəetmə üsullarına keçid istiqamətində maarifləndirmə işləri davam etdirilir.
Belə ki, mütəmadi olaraq respublikanın ayrı-ayrı şəhər və rayonlarında mənzil mülkiyyətçiləri ilə görüşlər keçirilir, müvafiq qanunvericiliyin müddəaları izah olunur, maarifləndirici broşurlar və materiallar təqdim edilir, mənzil mülkiyyətçiləri müştərək cəmiyyətlərinin (MMMC) yaradılması istiqamətində dəstək göstərilir.
Nazirlikdən mətbuata verilən məlumata görə, həyata keçirilən maarifləndirmə və təbliğat işlərinin nəticəsi olaraq, özəl mənzil fondunun idarə olunmasında vətəndaşların fəallığı artıb, paytaxtın Yasamal, Nəsimi, Nərimanov və Nizami rayonları üzrə daha 5 yeni MMMC yaradılaraq Ədliyyə Nazirliyi tərəfindən dövlət qeydiyyatına alınıb. Bununla da qeydiyyatdan keçmiş MMMC-lərin sayı 43-ə çatıb.
O da məlumdur ki, bazar iqtisadiyyatının inkişaf etdiyi vətəndaş cəmiyyətlərində insanların təsis etdiyi birliklərdən biri də mənzil mülkiyyətçilərinin müştərək cəmiyyətidir. Son illər ölkədə aparılan iqtisadi islahatlar nəticəsində, digər sahələrlə yanaşı, mənzil-kommunal təsərrüfatı sektorunun inkişafında da əhəmiyyətli tədbirlər həyata keçirilib. Bu sahənin yenidən qurulması istiqamətində müsbət dəyişikliklər baş verib. Mənzil-kommunal təsərrüfatı sektorunda həyata keçiriləcək islahatların mükəmməl qanunvericilik bazasını təşkil edən və beynəlxalq tələblərə uyğunlaşdırılan Mənzil Məcəlləsi qəbul edilib. Yeni mənzil qanunvericiliyinə görə, çoxmənzilli bina üç idarəetmə üsulundan biri - sahə mülkiyyətçiləri tərəfindən bilavasitə, mənzil mülkiyyətçiləri müştərək cəmiyyəti və ya idarəedici təşkilat tərəfindən idarə edilə bilər.
Bütövlükdə, ekspertlər MMMC-lərin yaradılmasına, bu istiqamətdə görülən işlərə necə yanaşır?
Sözügedən məsələni dəyərləndirən əmlak məsələləri üzrə ekspert Nüsrət İbrahimovun fikrincə, yeni binalar kooperativ binalar hesab edilir və onların saxlanması üçün istismar xərcləri var: "Buna görə də Mənzil Məcəlləsində Mənzil Mülkiyyətçilərinin Müştərək Cəmiyyətinin yaradılması nəzərdə tutulub. MMMC yaradılandan sonra xərclərin smetası tutulur, ümumi yığıncaqda müzakirə edilir və qəbul olunur. Sonra da smetaya uyğun hərəkət edilir. Buraya binanın təmir xərcləri, lift, qaz, su problemləri, işçilərin saxlanması xərcləri daxildir. MMMC ildə iki dəfə hesabat verir. Hazırda MMMC-lərin yaradılmasında bir çox problemlər var. Başlıca problem mənzil mülkiyyətçilərinin bu sahədə həvəssiz olmasıdır. MMMC-lərin yaradılması üçün mənzilləri tikən MTK binaları qəbul komissiyalarına təhvil verməlidir ki, 6 ay müddətinə MMMC-lər yaradılsın. Digər tərəfdən, burada mənzillərə sahəsinə görə fərqli qiymətlər qoyula bilər. Çünki elə bina ola bilər ki, onun saxlanma xərci 5 min manat olsun, elə bina da ola bilər ki, 35 min manat olsun. Bura liftlərin sayı və orada elektrik şəbəkəsinin yüklənmə səviyyəsi, mühafizə sistemi, binanın nə dərəcədə elektronlaşdırılması, binaya baxmaq üçün saxlanan işçi sayı da daxildir".
Vidadi ORDAHALLI
