Vüqar Bayramov: "Ölkəyə gələn turistlərin sayı, ticarət dövriyyəsinin artması və bu şoppinqin Bakı brendi kimi tanıdılması nəzərə alınmaqla..."
Azərbaycanda ilk dəfə olaraq keçirilən Bakı Ticarət Festivalı aprelin 10-dan etibarən başlayıb və mayın 10-da yekunlaşacaq. Məlumat üçün bildirək ki, adıçəkilən festival Prezident İlham Əliyevin 2016-cı il sentyabrın 1-də imzaladığı "Azərbaycan Respublikasında turizmin inkişafı ilə bağlı əlavə tədbirlər haqqında" Sərəncama uyğun olaraq təşkil edilib.
Ticarət Festivalının keçirilməsində məqsəd Azərbaycanın turizm və iqtisadi potensialının yüksəldilməsi, sahibkarlıq fəaliyyətinin təşviq edilməsi ilə ölkənin ticarət dövriyyəsinin artırılmasının stimullaşdırılmasıdır. Bu festival həm də vergi sisteminin təşviqini, fiziki şəxslər tərəfindən Azərbaycanın ərazisində alınmış istehsal, yaxud kommersiya məqsədləri üçün nəzərdə tutulmayan mallara görə ödənilmiş əlavə dəyər vergisinin qaytarılması (ƏDV) sisteminin ölkədə tətbiqi ilə vergi inzibatçılığının daha da təkmilləşdirilməsini, rezident və qeyri-rezident vergi ödəyicilərinin xidmət sisteminin inkişaf etdirilməsini nəzərdə tutur.
ƏDV-ni 5 bankın - "Kapital Bank", "PAŞA Bank", "Yapı Kredi Bank Azerbaijan", "Bank Silk Way" və "Azərbaycan Sənaye Bankı"nın filiallarında geri almaq mümkün oldu.
Bakı Şoppinq Festivalı Azərbaycan iqtisadiyyatına necə təsir göstərdi? Bu sualla ekspertə müraciət etdik.
İqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, Ticarət Festivalının keçirilməsində əsas məqsəd Azərbaycanın turizm imkanlarının tanıdılması və ticarət dövriyyəsinin artırılması idi. Şoppinq Festivalı hələ tam bitmədiyi üçün son nəticələr açıqlana bilməz: "Ancaq ilkin nəticələr ürəkaçandır. Ölkəyə gələn turistlərin sayı, ticarət dövriyyəsinin artması və bu şoppinqin Bakı brendi kimi tanıdılması nəzərə alınmaqla, qarşıya qoyulan məqsədlərə nail olunduğunu söyləmək olar. Bakı Şoppinq Festivalının brend olaraq tanıdılması vacibdir. Amma onu da nəzərə almaq lazımdır ki, şoppinq festivalları dünyanın bir sıra ölkələrində keçirilir. İlk dəfə Azərbaycanda keçirilən bu festival artıq xarici ölkələr və onların vətəndaşları tərəfindən böyük maraqla qarşılanır".
İqtisadçının fikrincə, turizm ölkə iqtisadiyyatının çox əhəmiyyətli və sürətlə inkişaf edən sektorudur: "Dünyanın müxtəlif ölkələrindən gələn turistlər "həm ziyarət, həm ticarət" prinsipi ilə səyahət etdikləri dövrdə nisbətən endirimli şərtlərlə alış-veriş edir. Bakıda keçirilən Şoppinq Festivalı Azərbaycanda turizmin inkişafı, xarici turistlərin cəlb edilməsi, gələnlərin isə daha aktiv alış-veriş etməyə həvəsləndirilməsi məqsədi daşıyır. Bu tədbirlərin keçirilməsi turizmin inkişafı ilə bağlı dövlət başçısının fərmanında nəzərdə tutulub. Həmin sənədə əsasən Şoppinq Festivalı hər il keçiriləcək".
Günel CƏLİLOVA
