Rəsul Cahangirli: "Güzəştli saziş imkan verəcək ki, Azərbaycan bir sıra məhsullarını rahat şəkildə Türkiyə bazarına çıxara bilsin"
Türkiyə və Azərbaycan arasında güzəştli ticarət sazişinə dair 68 sahə müəyyən edilib. Bunu mətbuata açıqlamasında Türkiyənin Azərbaycandaki Səfirliyinin ticarət müşaviri Ahmet Ataker deyib. Müşavir bildirib ki, sazişlə bağlı müqavilə üzərində hazırda iş gedir və bu ilin sonuna qədər müqavilənin imzalanmasi gözlənir. O qeyd edib ki, bu müqavilə bir başlanğıc olacaq: "Türkiyənin ən böyük hədəfi Azərbaycanla sərbəst ticarət sazişinin imzalanmasıdır".
O da məlumdur ki, Azərbaycan bu gün ayrı-ayrı ölkələrlə ikitərəfli əlaqələrin inkişafına xüsusi önəm verir. Son illər bu sahədə müsbət nəticələr əldə edilib, qarşılıqlı faydalı əməkdaşlığın genişləndirilməsi üçün yeni istiqamətlər müəyyənləşdirilib.
Azərbaycan dövlət müstəqilliyini bərpa edəndən sonra rəsmi Bakı ikitərəfli əməkdaşlıqda qonşu dövlətlərlə əlaqələrin inkişafına xüsusi diqqət yetirib. Qardaş və dost Türkiyə ilə əlaqələr daim yüksələn xətlə inkişaf edir. Həm regionun, həm də Avropanın enerji təhlükəsizliyinin təmin olunmasına töhfə verən Cənubi Qafqaz enerji dəhlizi, ilk növbədə, Azərbaycan və Türkiyənin siyasi iradəsi ilə gerçəkləşib. Bununla yanaşı, Azərbaycan qardaş Türkiyənin iqtisadiyyatına böyük həcmdə investisiya qoyur.
Ümumilikdə, 68 sahəni əhətə edəcək güzəştli ticarət sazişi imzalansa, bu, iki ölkə arasında ticarət dövriyyəsinin artmasına necə təsir göstərəcək? Məsələyə münasibət bildirən ekspert Rəsul Cahangirlinin sözlərinə görə, saziş imzalanandan sonra iki ölkə arasında ticarət dövriyyəsi artacaq: "Dünyadakı iqtisadi böhranla əlaqədər son illər Azərbaycanla Türkiyə arasında ticarət dövriyyəsi azalıb. Ancaq bu müvəqqətidir. Hesab edirəm ki, zamanla iki ölkə arasında ticarət dövriyyəsi artacaq. Ümumilikdə, bir sıra ölkələr arasında iqtisadi əlaqələr sərbəst ticarət sazişləri ilə tənzimlənir. Yeri gəlmişkən, xarici ticarət dövriyyəsi, idxal-ixrac əməliyyatları ölkələrarası münasibətlərin, iqtisadi əlaqələrin inkişafında mühüm amillərdəndir. Məhz buna görədir ki, dövlət başçıları, eləcə də nümayəndə heyətləri arasında keçirilən görüşlərin, danışıqların əsas mövzularından birini məhz xarici ticarət dövriyyəsinin artırılması təşkil edir. Bu baxımdan hesab edirəm ki, analoji saziş qardaş dövlətlə nə qədər tez imzalansa, bu bir o qədər iki tərəf arasında iqtisadi əlaqələrin inkişafına müsbət təsir göstərəcək. Güzəştli saziş imkan verəcək ki, Azərbaycan bir sıra məhsullarını rahat şəkildə Türkiyə bazarına çıxara bilsin. Nəzərə alsaq ki, Türkiyə böyük bazardır, o zaman sözügedən məhsulların daha tez realizə olunması üçün imkan yaranacaq. O üzdən, belə bir sazişin imzalanmasını dəstəkləyirəm".
Vidadi ORDAHALLI
