Ramil Osmanlı: "Burada önəmli olan məsələ məlumatlandırma icraatı qaydasında vaxtın tezləşdirilməsi və..."
Azərbaycanda tikintiyə icazənin müddəti azaldılır. Bununla bağlı Şəhərsalma və Tikinti Məcəlləsinə dəyişikliklər təklif edilir. Layihədə tikinti obyektinin layihələndirilməsi üçün zəruri olan ilkin məlumatların əldə edilməsi, gələcək tikintinin uyğunluğunun əvvəlcədən müəyyənləşdirilməsi üçün ərazinin tikinti planlarının real tətbiqi, texniki şərtlərin verilməsi müddətinin azaldılması və "vahid pəncərə" prinsipi ilə tənzimlənməsi, tikinti layihələri üçün tikintiyə icazəalma müddətinin azaldılması, ekspertizası tələb olunmayan tikinti layihələri üçün aidiyyəti təşkilatlardan rəylərin alınması prosedurunun sadələşdirilməsi nəzərdə tutulur.
Məcəllədə yeni məlumatlandırma sisteminin də qurulması nəzərdə tutulub. Bu sistem vasitəsilə sifarişçilər elektron qaydada, rahat şəkildə tikintiyə dair tələb olunan məlumatları əldə edə biləcək.
Bütün bu yeniliklər tikinti layihəsinin hazırlanmasının mümkün dərəcədə asanlaşdırılmasına, həmçinin, mövcud tikinti və şəhərsalma normativlərinə uyğun aparılmasına yönəlib.
Bundan əlavə, ilkin məlumatlar əsasında layihə hazırlayan sifarişçi layihə sənədləri ilə müvafiq icra hakimiyyəti orqanına müraciət edir. Tikinti obyektləri ekspertizası tələb olunan və olunmayanlara bölünür. Hazırda hər iki kateqoriya obyekt üzrə tikintiyə icazəalma müddəti 3 ayadək uzanır. Dəyişikliklərə görə isə, ekspertizası tələb olunan obyektlərə icazə 1 ay müddətində, tələb olunmayanlara isə 12 iş günü müddətində veriləcək.
Tikintiyə icazə verilərkən, hazırda aidiyyəti təşkilatlarla 15 gün ərzində razılaşdırma proseduru mövcuddur.
Dəyişikliklərə əsasən, yalnız ekspertizadan keçirilməsi tələb olunan obyektlərə dair 15 gün ərzində aidiyyəti təşkilatlarla razılaşdırılmalar aparılacaq, ekspertizadan keçirilməsi tələb olunmayan obyektlərə isə bu prosedur cəmi 5 gün təşkil edəcək.
Layihədə bildirilir ki, bütün texniki şərtlər müvafiq icra hakimiyyəti orqanı tərəfindən sifarişçinin tikintiyə icazə müraciəti əsasında "ASAN" sistemi vasitəsilə 10 gün ərzində əldə ediləcək və sifarişçiyə təqdim olunacaq.
Layihə Milli Məclisin mayın 16-da keçiriləcək plenar iclasında müzakirəyə çıxarılacaq.
Bütövlükdə, tikintiyə icazənin müddətinin azaldılmasına ekspertlərin münasibəti necədir? Bu, tikinti işlərinin aparılmasına necə təsir göstərəcək? Sözügedən məsələni dəyərləndirən əmlak məsələləri üzrə ekspert Ramil Osmanlının fikrincə, bu düzəlişlər tikintiyə icazə alınması ilə bağlı prosedurları sadələşdirəcək: "Şəhərsalma və Tikinti Məcəlləsinin 74.4 maddəsində məlumatlandırma icraatında müvafiq icra hakimiyyətinə edilən müraciətə 1 ay müddətində cavab verilməli idisə, indi həmin cavab 15 günə qədər azaldılıb. 74.6-cı maddədə isə deyilir ki, əgər ərazinin müfəssəl planı varsa, 1 ay müddətinə, yoxdursa, 3 ay müddətinə müraciətə cavab verilməlidir. Əgər müraciətə cavab verilməzsə, yeni qaydaya görə, məlumatlandırma icraatı qəbul edilmiş hesab olunur və tikintiyə başlamaq olar. Tikintinin ölçüləri məsələsi də gündəmdədir. İkimərtəbəli ev hər mərtəbəsinin hündürlüyü 3 metr, ümumi sahəsinin ölçüsü 1400 kvadratmetr, tikinti sahəsi isə 1000 kvadratmetrdən çox olmamaq şərtilə tikilməlidir. Bu dəyişiklik fərdi yaşayış evləri ilə yanaşı, kiçik ölçülü obyektlərə də aiddir. Əvvəllər kiçik ölçülü obyektlərin tikintisi üçün icazə alınmalı idi. İndi isə bu, məlumatlandırma icraatına daxildir. Yəni, sadəcə, xəbərdarlıq etməklə tikintiyə başlamaq mümkündür. Əvvəllər kiçik ölçülü tikililərin sahibləri xeyli sənəd toplamalı olurdu. İndi artıq məlumatlandırma icraatı qaydasında tikintiyə icazə veriləcək. Burada önəmli olan məsələ məlumatlandırma icraatı qaydasında vaxtın tezləşdirilməsi və prosedur qaydalarının sadələşdirilməsidir".
Vidadi ORDAHALLI
