Beynəlxalq Valyuta Fondu Azərbaycanda fəaliyyət göstərən daha bir neçə bankın lisenziyasının ləğv olunmasını istisna etmir. Bu barədə BVF-nin "Regional iqtisadiyyatın inkişaf perspektivləri: Qafqaz və Mərkəzi Asiya" adlı icmalında qeyd olunur. Bildirilir ki, Azərbaycanda kapitallaşma və dövlət tərəfindən problemli kreditlərin alışı prosesi davam edib. Lakin kapitallaşma ilə bağlı yeni planların işlənməsindən sonra daha bir neçə bank bağlana bilər.
Qeyd edək ki, 2016-cı ildə Azərbaycanda müxtəlif səbəblərdən 11 bankın lisenziyası ləğv olunub. Hazırda Azərbaycanda fəaliyyət göstərən bankların sayı 32-dir.
BVF-nin Azərbaycanda fəaliyyət göstərən bir neçə bankın bağlanacağına dair qeyd etdiyi fikrin nə dərəcədə realdır?
İqtisadçı-ekspert Natiq Cəfərli qeyd etdi ki, Azərbaycanın bütün banklarında problem var. Sadəcə, bəzilərində problem həddindən artıq, digərlərində isə hələ ki, idarə olunacaq səviyyədədir: "Bunun əsas səbəbi problemli kreditlərin həcminin artıq olmasıdır. Elə banklar var ki, onlarda kredit portfelinin yarısını, hətta yarısından çoxunu problemli kreditlər təşkil edir. Belə olduğu təqdirdə, təbii ki, banklar yenidən kreditləşməyə başlayacaq. Bu da ümumi iqtisadi aktivliyə çox mənfi təsir göstərən əsas amillərdən birinə çevrilir. Banklarda faiz dərəcələri yüksək olduğundan, iqtisadi aktivlik aşağı düşdüyündən, nə iş adamlarında, nə də fiziki şəxslərdə kredit götürməyə maraq qalıb. Bu da bankların işini daha da çətinləşdirir".
Həmsöhbətimizin sözlərinə görə, hazırda kritik həddə olan və bağlanma təhlükəsi ilə üzləşən banklar mövcuddur: "Kapitallaşma səviyyəsi kiçik olan bankların hamısı kritik həddədir. Yaxın zamanda 10-15 bankın yenidən birləşdirilməsi və ya həmin bankların lisenziyasının ləğv edilməsi ilə bağlı qərarın verilməsi gözləniləndir".
Günel CƏLİLOVA
